Një raport i ri nga Agjencia Ndërkombëtare për Energjinë Atomike ka rikthyer në qendër të vëmendjes programin bërthamor të Iranit, në një moment kur Lindja e Mesme është sërish në flakë pas një sulmi izraelit ndaj objektivave iraniane.
Sipas të dhënave të publikuara më 12 qershor, Irani ka grumbulluar rreth 400 kg uranium të pasuruar në nivelin 60%, një përqindje që konsiderohet teknologjikisht shumë afër nivelit të nevojshëm për ndërtimin e armës bërthamore. Megjithatë, AIEA thekson se aktualisht nuk ka prova që Irani po ndërton një bombë.
Pavarësisht kësaj, reagimet politike nuk munguan. Ish-presidenti amerikan Donald Trump, një nga kritikët më të mëdhenj të marrëveshjes bërthamore të vitit 2015, u shpreh menjëherë: “Nuk më intereson çfarë thonë shërbimet sekrete. Irani është shumë pranë bombës.”
Një deklaratë që bie ndesh me raportin e fundit të inteligjencës amerikane, i cili sugjeron se Irani ndodhet të paktën tre vite larg prodhimit të një arme të tillë.
Ndërkohë, vetëm një ditë pas publikimit të raportit, Izraeli ndërmori një ofensivë ndaj objektivave iraniane, duke e justifikuar veprimin si “vetëmbrojtje përballë një kërcënimi real”. Nga ana tjetër, Irani akuzoi drejtpërdrejt AIEA-në se po nxit një konflikt të hapur përmes interpretimit të të dhënave dhe e quajti raportin “justifikim për luftë”.
