Grupi i Tifozëve Kuq e Zi, që është një nga tifogrupet më të mëdha në vend, do të ndërtojë 2 qendra shëndetësore, të cilat u shembën nga tërmeti i fuqishëm i 26 nëntorit 2019. Në mbledhjen e djeshme të qeverisë është miratuar projektmarrëveshja e bashkëpunimit mes grupit të Tifozëve Kuq e Zi dhe Këshillit të Ministrave.
Dy qendrat shëndetësore që do të rindërtohen nga tifogrupi ndodhen në Durrës dhe Shijak, që ishin edhe zonat më të dëmtuara nga tërmeti. Tifozët Kuq e Zi ju kanë qëndruar pranë qytetarëve me ndihma të ndryshme edhe gjatë ditëve të vështira që pasuan pas tërmetit shkatërrimtar. Kujtojmë se tërmeti i 26 nëntorit ju mori jetën 51 personave dhe mbi 3 mijë të tjerë mbetën të plagosur.
Vendimi i plotë për rindërtimin e qendrave shëndetësore
MIRATIMIN E PROJEKTMARRËVESHJES SË BASHKËPUNIMIT, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE TIFOZËVE KUQ E ZI, PËR RINDËRTIMIN E DY QENDRAVE SHËNDETËSORE NË BASHKITË DURRËS DHE SHIJAK
Në mbështetje të nenit 100 të Kushtetutës dhe të nenit 20, të aktit normativ nr.9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”, miratuar me ligjin nr.97/2019, me propozimin e ministrit të Shtetit për Rindërtimin, Këshilli i Ministrave
V E N D O S I:
Miratimin e projektmarrëveshjes së bashkëpunimit, ndërmjet Këshillit të Ministrave të Republikës së Shqipërisë dhe Tifozëve Kuq e Zi, për rindërtimin e dy qendrave shëndetësore në bashkitë Durrës dhe Shijak, sipas tekstit që i bashkëlidhet këtij vendimi.
Autorizimin e ministrit të Shtetit për Rindërtimin për nënshkrimin e kësaj projektmarrëveshjeje.
Ngarkohen ministri i Shtetit për Rindërtimin dhe bashkitë Durrës e Shijak për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
