Çdo javë, iconstyle.al do të udhëtojë së bashku me ju në destinacione të ndryshme nëpër botë, në një rubrikë që synon të përfshijë të apasionuarit pas udhëtimit, por duke shërbyer gjithashtu si një guidë për këdo që i ka këto destinacione në listën e vendeve për të vizituar.
Një udhëtim në të shkuarën e hershme është ai në Romë, Qyteti i Përjetshëm. Me të mbërritur nga aeroporti në zemrën e kryeqytetit italian, përjeton një shkëputje nga modernizmi i metropoleve të sotme, për t’u zhytyr në histori, pasi në çdo 10 hapa, përgatitu të përballesh me monumente historike.
Në Romë grataçielat numërohen me gishta dhe në qendrën historike, nuk do të gjeni absolutisht asnjë të tillë. Romanët nuk i janë dorëzuar manisë së ndërtimeve vertikale, por i kanë qendruar besnikë rrënjëve të tyre dhe kjo është pikërisht arsyeja përse Roma është një ndër 20 qytetet më të vizituara në botë. Nga historia jashtëzakonisht e pasur, tek arti, moda e kulinaria, kryeqyteti italian ka diçka për këdo, ndaj ja ç’duhet të dish:
Së pari, merr me vete këpucët e tua më të rehatshme sepse do ecësh. Oh sa do ecësh. Botërisht dihet se Roma lë disi për të dëshiruar përsa i përket sistemit të trasportit dhe mbase është më mirë kështu. Kjo sepse do të ishte mëkat të mos i shëtisje në këmbë të gjitha rrugicat, piazza-t e skutat e mrekullueshme romane. Merr një shishe uji me vete për ta mbushur herë pas here në çezmat që ndodhen kudo nëpër qyetet, sepse në Romë praktikisht është turp të blesh ujë.
Së dyti, zgjidhe me kujdes periudhën në të cilën do ta vizitosh. Qëndro larg muajve korrik dhe gusht pasi dyndja e jashtëzakonshme e turistëve dhe vapa zhuritëse nuk do të lënë ta shijosh qytetin siç duhet. Javët e para të pranverës janë një ide shumë e mirë, e po ashtu dhe vjeshta, duke qenë se në Romë i ftohti i vërtetë nis në dhjetor.
Së treti, bëhu gati të shtosh disa kilogramë më shumë! Nuk ke zgjidhje…
Çfarë të bësh në Romë?
Fontana di Trevi
Padyshim shatërvani më i famshëm në botë, ku është xhiruar dhe skena ikonike e filmit të Fellinit “La dolce vita” me Anita Ekberg, Fontana di Trevi të lë pa frymë.
Teksa shëtit në rrugicat gjarpëruese rreth tij, fillon të dëgjosh zhurmën e ujit që gurgullon, por kur e sheh për herë të parë, je tërësisht i papërgatitur për madhështinë që të shfaqet para syve. Hidh një monedhë në shatërvan dhe sipas legjendës, një vit më vonë do të kthehesh sërish në Romë. Kujdes: Personat që ofrohen të të bëjnë foto do të të kërkojnë para (kjo ndodh në çdo pikë turistike) dhe mos u ul në bordurën e shatëvanit pasi do të përballesh me disa policë të inatosur italianë.
Koloseu
Nëse nuk ke parë Koloseun, nuk ke parë Romën! Amfiteatri i lashtë është vendi perfekt për një udhëtim pas në kohën e gladiatorëve e perandorëve të pamëshirshëm. Përgatitu për një radhë të gjatë dhe zgjidh një biletë për të parë dhe Forumin Roman, zemrën e Perandorisë Romake ku dikur ndodhej administrata.
Vatikani
Nëse je për më shumë se dy ditë në Romë, mos e humb Vatikanin! Qyteti-shtet, përveçse tejet piktoresk, ofron dhe Muzeun e Vatikanit, që është domosdoshmëri për çdo adhurues të artit.
Zgjidh mesditën për të shmangur radhët e stërgjata (edhe 2-orëshe ndonjëherë) dhe përhumbu në historinë e morinë e jashtëzakonshme të veprave të artit që kanë mahnitur gjithë botën. Bëni një kërkim paraprak të gjithçkaje që doni të shihni pasi ky muze, realisht nuk ka fund. Shkallët spirale janë një ndër pikat më të fotografuara në të gjithë muzeun për bukurinë e tyre, por kjo me siguri pasi në Kapelën Sistine mbresëlënëse të Michelangelo-s, nuk lejohet të shkrepësh foto.
Në të dalë, Bazilika e Shën Pjetrit gjithashtu nuk duhet lënë pa parë!
Trastevere
Në anën e majtë të lumit Tevere, shtrihet Trastevere, lagja më përrallore në të gjithë Romën. E ndërtuar vetëm me rrugica të ngushta, kjo zonë është vendi perfekt për një shëtitje të gjatë e të qetë. Megjithatë, kjo nuk vlen për natën. Në mbrëmje Trastevere gumëzhin nga jeta e natës me pub-e e lokale të zhurmshme, tejet të preferuara nga rinia romane, pikërisht për frymën “cool” që kjo zonë ka.
Panteoni
Tempulli i hershëm roman, që tashmë shërben si kishë, është një ndër ndërtesat e lashta të ruajtura më mirë në Romë dhe konsiderohet një mrekulli e arkitekturës. Në kupolën e tij ndodhet një hapsirë boshe e quajtur “oculus” (syri) që lejon hyrjen e dritës natyrale në godinë, por edhe shiut.
Piazza përpara tij është gjithashtu tejet e këndshme, e mbushur me lokale e dyqane me produkte artizanale, që janë dhe ndër suveniret më të bukura për të marrë me vete në shtëpi, sepse në Romë është mëkat të blesh një varëse çelsash si suvenir.
Parku Villa Borghese
Parku gjigant është padyshim vendi më relaksues i të gjithë Romës, që përveç qetësisë dhe gjelbërimit të pafund, ofron dhe një sërë aktivitetesh. Në të gjendet një kopësht zoologjik fantastik me kafshë të egra nga e gjithë bota.
Në të gjithashtu gjendet Galleria Borghese, një galeri arti që numëron një mori kryeveprash botërore nga artistë si Caravaggio, Rafaello, Bernini etj.
Piazza Spagna
Një prej shesheve më të famshme e elegante në gjithë Romën, Piazza Spagna është thjesht një mrekulli! E rrethuar me godinat shumëngjyrëshe në stil barok, Piazza Spagna ofron zonën më fantastike për shopping me një pafundësi dyqanesh nga të gjitha llojet, përfshirë dhe ato super luksoze.
Në qendër të saj ndodhet shatërvani i famshëm “Barcaccia” i krijuar nga Bernini dhe pak më tej, shkallët e famshme të Piazza Spagna-s ku Audrey Hepburn hante akullore në filmin “Roman Holiday”.
Çfarë të hash në Romë?
Pjesa jonë e preferuar! Nëse keni dëgjuar dikë të thotë se në Romë nuk hahet mirë, mos i besoni, thjesht nuk ka ditur ku të shkojë ndaj ju s’duhet të bëni të njëjtin gabim. Nëse nuk keni një guidë të besuar në Qytetin e Përjetshëm, duhet patjetër të bëni pak kërkim online për të zbuluar vendet me kuzhinë autentike romane për të marrë më të mirën e kësaj kuzhine. Qendroni larg restoranteve tipike të turistëve me menunë të afishuar në rrugë dhe mundohuni të identifikoni vendet ku hanë vendasit: italianët i dinë gjërat mirë kur vjen puna tek ushqimi.
Pasta, pasta, pasta
Nuk mundet të shkosh në Romë e të mos provosh pastat fantastike italiane. Thjesht nuk mundesh! Cacio e peppe, pasta tradicionale romane me djathë pecorino dhe piper të freskët, në pamje të parë duket gjëja më e thjeshtë në botë. Por provoje në një restorant tradicional roman dhe do të lesh mendtë.
Një carbonara e bërë siç duhet do t’ju bëjë të harroni gjithçka tjetër që ndodhet në tryezë dhe së fundi, amatriciana është thjesht për të lëpirë gishtat!
Shoqëruesja perfekte është padyshim vera dhe në çdo restorant që do të shkoni, ju premtojmë se nuk do t’ju zhgënjejë, as ajo më e lira.
Pizza
Kërkoni online për pizza-t më të mira në Romë dhe shkoni, mos e mendoni dy herë. Thjesht mos bëni gafën të porosisni pizza në drekë sepse ndonjë kamarier mund edhe t’ju shohë çuditshëm. Pizza konsumohet vetëm pasdite dhe në darkë. Me një ndërthurje hyjnore të krokantes dhe butësisë, pizza mund të ketë sipër ç’të dojë, është brumi ai që e bën perfekte.
Agjinare alla giudia
Jo ekzaktësisht pjata më e shëndetshme, por kjo recetë e kuzhinës tejet të pasur të hebrenjve të vendosur në Romë duket provuar. Agjinarja skuqet dy herë në vaj të përvëluar duke i shndërruar gjethet në patatina të shijshme dhe zemrën të butë e të lëngshme. Agjinarja alla giudia shërbehet me kripë dhe është një antipastë e shkëlqyer.
Akullorja
Dimër, verë… nuk ka rëndësi. Akullorja në Romë është obligim dhe më besoni, nuk do të pendoheni. Zgjidhni një prej dyqaneve të hershme që e kanë traditë prodhimin e akullores dhe mos hezitoni të provoni morinë e shijeve që ato ofrojnë.
Porchetta
Gjendet rëndom në dyqanet ushqimore të Romës dhe është baza për shumë sandwich-e të shijshme. Mish derri i bërë role me erëza të ndryshme, i pjekur për orë të tëra derisa sipërfaqja bëhet krokante dhe qendra e butë. Gjëja më e shijshme e të gjitha kohërave.
Pecorino Romano
Djathi tipik roman, i bërë sipas traditës me përbërësit e duhur, është një dhuratë që kryeqyteti italian i ka bërë botës. Është perfekt për të shoqëruar pastat apo verën dhe është suveniri më i mirë që mund t’i sillni dikujt nga Roma.
