Të shtunën, më 21 qershor, në Romë do të zhvillohet një paradë e veçantë për qentë e strehës, në kuadër të eventit “Notte Bianca dell’EUR”. Aktiviteti do të nisë në orën 18:30, përgjatë Viale America dhe Via Tupini, dhe synon t’u ofrojë qenve një ditë ndryshe jashtë strehës, ndërsa promovon adoptimin e tyre nga familje të reja.
Parada, që këtë vit shënon edicionin e saj të pestë, mban titullin simbolik “Il Canile va in città” (“Streha vjen në qytet”) dhe ofron edhe mundësinë që pronarët e qenve të vendosin një çip identifikues tek qentë dhe regjistrojnë kafshët e tyre falas.
Iniciativa ka sjellë rezultate konkrete në edicionet e kaluara, ku qindra qytetarë morën pjesë dhe shumë prej qenve u adoptuan.
Patrizia Prestipino, përfaqësuese e bashkisë për mbrojtjen e kafshëve, theksoi se “përtej disa orëve lirie, kjo është një përpjekje për të gjetur familje të reja për qen që kanë shumë dashuri për të dhënë”. Ajo e cilësoi paradën si një “sukses të madh”, por shtoi se “ende shumë kafshë mbeten të mbyllura në strehimore”.
Fokusi mbetet te adoptimi me përgjegjësi dhe ndërgjegjësimi qytetar për të ndryshuar fatin e qenve që presin një shans të dytë.
