Eksperimenti që dy laborantë dentarë shqiptarë po bënin për të krijuar një pjesë që lejon modifikimin e ventilatorëve të nevojshëm për pacientët në gjendje të rëndë me COVID-19 ka rezultuar me sukses!
Nisma e Besar Lalikes dhe Eldian Cepeles për të cilën “iconstyle.al” shkroi ditën e hënë për herë të parë, mund të ndryshojë gjithçka për pacientët në gjendje të rëndë, pasi lejon që dy pacientë të trajtohen njëkohësisht në një ventilator të vetëm. Burime pranë “iconstyle.al” konfirmuan se dy laborantët shqiptarë kanë marrë udhëzime nga Bologna për ndërtimin e prototipit i cili ditën e sotme është testuar me sukses në QSUT. Ata kanë realizuar gjithçka me shpenzimet e tyre, ndërkohë që u është bërë thirrje profesionistëve të tjerë të fushës që t’i furnizojnë me rezinë.
Arritjen e jashtëzakonshme e ka konfirmuar mbrëmjen e sotme rektori i Universitetit të Mjekësisë dhe kreu i Task-Forcës COVID-19 prof. dr. Arben Gjata në studion e emisionit “5 Pyetje nga Babaramo”.
“Përshëndes dy djem, një nga Vlora një nga Kavaja që më kontaktuan pasi kishin parë një profesor në Itali që me një aparat mund të mbaheshin dy pacientë, patëm mundësi të lidhemi me miqtë italianë na e solli projektin, e derdhën atë tubin dhe sot e provuam dhe funksiononte, kjo na krijon mundësi të dyfishojmë kapacitetet, nuk do ta provojmë tani por në kushte ekstreme. Është një tub që të jep ajër, është një tub që del nga aparati dhe jep ajër për dy pacientë. Derisa e kanë bërë në Amerikë dhe në Itali, funksioni edhe këtu. I përshëndes dy djemtë se i bënë me shpenzimet e veta. Janë teknikë që kanë një laborator, dhe që kanë zemër dhe shpirt dhe ato pak para që kanë t’ia vendosin në dispozicion këtij vendi” tha Gjata, i cili ka qenë dhe personi që i ka dhënë dritën jeshile eksperimentit që rezultoi i suksesshëm.
Kjo arritje është e një rëndësie të jashtëzakonshme për vendin tonë, ku numri i ventilatorëve është tejet i kufizuar. Sipas shifrave jozyrtare, në vend ka vetëm 140 ventilatorë që janë vendimtarë për jetën e pacientëve me komplikacione të rënda, ndërkohë që ministrja Ogerta Manastirliu ka konfirmuar sot se është gati kontrata për blerjen e 54 respiratorëve dhe do të blihen dhe 100 të tjerë.
Këto lëvizje të ministrisë vijnë në një kohë kur në vend janë regjistruar të paktën 104 raste të konfirmuara me COVID-19 dhe 4 persona kanë ndërruar jetë.
