Doktorët në New York po kurojnë pacientët në gjendje të rëndë nga koronavirusi me doza masive vitamine C, pas rezultateve premtuese që kjo taktikë ka dhënë në Kinë, ku ishte dhe epiqendra e pandemisë. Mjeku Andrew Weber, ekspert në sëmundjet e pulmonare në Long Island ka treguar për “New York Post” se u ka dhënë pacientëve në repartin e terapisë intensive 1.500 miligramë vitaminë C intravenoze.
Në vijim kjo dozë u jepet pacientëve 3 ose 4 herë në ditë. Ndonëse këto doza janë 16 herë më të larta se ato të lejuara nga Instituti Kombëtar i Shëndetit në SHBA, Weber shprehet ky trajtim ekperimental që ka dhënë rezultate pozitive në Kinë.
“Pacientët që morën vitaminë C reaguan shumë më mirë se ata që nuk morën vitaminë C. Ndihmon shumë, por nuk është theksuar pasi nuk është një medikament i rëndësishëm.”-shprehet mjeku.
Ai shpjegon se trajtimi me vitaminë C është kryer paralelisht me trajtimin me hydrochloroquine (anti-malarial) dhe azithromycin (antibiotik), si dhe holluesë gjaku, pasi FDA-ja aprovoi përdorimin e tyre eksperimental.
“Tek pacientët në gjendje të rëndë, në të cilët trupi mbivepron në tentativë për të luftuar infeksionin, ka rënie drastike të vitaminës C. Prandaj ka kuptim tentativa për të mbajtur nivele të tilla të vitaminës C.”-shprehet Weber.
Aprovimi i përdorimit eksperimental të hydrochloroquine dhe azithromycin në SHBA vjen vetëm pak ditë pas thirrjeve të presidentit Donald Trump për përdorimin e tyre në spitalet amerikane, pasi një studim francez kishte arritur në përfundimin se kombinimi i tyre kishte pasur sukses në trajtimin e COVID-19.
Sakaq, në Shqipëri ende vijon të mos ketë informacion zyrtar mbi protokollin e trajtimit që ndiqet për pacientë me COVID-19.
Mjeku Tritan Kalo në një postim në Facebook zbuloi se pacientët në spitalin Infektiv trajtohen me Actemra (medikament kundër artritit që ka rezultuar i suksesshëm), Aluvia (medikament për HIV që ka rezultuar i suksesshëm) dhe Tamiflu (antiviral që ka rezultuar jo efektiv).
Në mbarë botën po përflitet për efektshmërinë e medikamentit anti-malarie hydrochloroquine, sikurse “iconstyle.al” thekson prej ditësh, por në një heshtje totale të Ministrisë të Shëndetësisë lidhur me protokollin e trajtimit, nuk dihet asgjë nëse mjekët shqiptarë po konsiderojnë përdorimin e këtij ilaçi.
Në vendin tonë deri më tani ka 146 të prekur të konfirmuar zyrtarisht, ndërsa numri i viktimave nga koronavirusi ka shkuar në 5./iconstyle.al
