Florenc Beqiraj, 23 vjeçari nga Shkodra, prej tre ditësh dergjet në shtratin e një spitali francez. Ai u masakrua barbarisht në një burg në Marsejë, ku mbahej për shkak të mungesës së dokumenteve.
Florenci ndodhet në vdekje klinike në një prej spitaleve francez. Shpresa e familjarëve është e madhe, por spitali duket se ua ka prerë në mes. Familjarët e të riut i kanë bërë apel për ndihmë shtetit shqiptar, pasi sipas tyre, në spital iu është kërkuar të firmosin për heqjen e tubave të oksigjenit, që për ta janë e vetmja shpresë që Florenci të rizgjohet një ditë.
Familjarëve të 23-vjeçarit iu janë bashkuar edhe disa personazhe të famshëm shqiptarë. Ata kanë nisur një fushatë sensibilizimi në rrjetet sociale, duke i bërë apel jo vetëm shtetit shqiptar, por edhe Kombeve të Bashkuara dhe Amnesty International, për të treguar sesi trajtohen refugjatët shqiptarë në Europë.
“Ky i ri shqiptar është rrahur për vdekje në një burg francez në Marsejë. Ai u kap duke punuar në mënyrë ilegale në një restorant, pa pasur dokumentet e duhura. Kërkonte azil politik dhe kishte ëndrra të mëdha…. Kjo është mënyra sesi emigrantët shqiptarë trajtohen në një vend të Bashkimit Europian.”, shkruhet në postimin e bërë nga VIP-at shqiptarë.
