Ermal Kapllanaj, kreu i Policisë Bashkiake të Tiranës, u bë një prej veglave të Lali Euros, duke i thurur lavde pushtetit të tij e duke i bërë presion punonjësve të tjerë për propagandë.
Tashmë e di i rritur e i vogël që Lali Euro s’ka lënë njeri pa blerë për ta mbushur me like e komente pozitive në rrjete sociale, e për të fshirë komentet negative e pakënaqësitë e popullit në postimet e tij.
Një prej tyre është edhe Kapllanaj, të cilit i janë publikuar mesazhe ku ushtron presion ndaj punonjësve të Policisë, për të bërë më shumë pëlqime e komente pozitive.
CNA ka siguruar disa mesazhe në grupin e “WhatsApp” të Policisë Bashkiake, ku Kapllanaj urdhëron punonjësit që të bëjnë sa më shumë “like” (pëlqime) për aktivitet e Erion Veliajt dhe bashkisë Tiranë.
Gjithashtu, ai i kërkon punonjësve të shpërndajnë statuset në rrjetet e tyre sociale dhe të bëjnë sa më shumë komente pozitive në statuset e policisë. Këtë urdhër, ai ia ka dhënë punonjësve të policisë të hënën e 15 prillit.
Në fakt, ky urdhër i Kapllanajt bie totalisht në kundërshtim me Ligjin për Policinë Bashkiake.
Në nenin 36 të këtij ligji, për të drejtat politike thuhet se punonjësi i Policisë Bashkiake nuk duhet të shprehë publikisht bindjet ose preferencat e tij politike gjatë kohës së ushtrimit të detyrës.
“Të drejtat politike
1. Policia Bashkiake është strukturë e depolitizuar.
2. Punonjësi i Policisë Bashkiake nuk mund të jetë anëtar i partive politike.
3. Punonjësi i Policisë Bashkiake nuk duhet të shprehë publikisht bindjet ose preferencat e tij politike gjatë kohës së ushtrimit të detyrës”, theksohet në nenin 36.
Megjithatë, Kapllanaj nuk pyet për ligjin, por duke bërë Maliqin urdhëron vartësit e tij të bëjnë propagandë politike dhe të shkelin ligjin bashkë me të.
Ky rast tregon fare qartë abuzimet dhe shkeljet e ligjit, për shkak të pushtetit që i jep posti për të mbështetur kryebashkiakun Erion Veliaj, i cili emëroi Kapllanajn si drejtues të policisë bashkiake.
Kapllanaj nga roli i drejtuesit të policisë është kthyer në propagandist për të shpëtuar shefin e tij të kapur me një bandë hajdutësh në bashkinë e Tiranës.
Erion Veliaj po përpiqet të zhvillojë aktivitete të shumta dhe ti japë një frymë pozitive hijes së zezë që ka rënë në Bashkinë e Tiranës pas arrestimit të te paktën 9 drejtorëve të rëndësishëm të këtij institucioni.
Ndërkohë SPAK vazhdon hetimet për zyrtarë të tjerë të bashkisë Tiranë përfshirë dhe riolin e Kapllanajt në disa afera korruptive nën hetim.
