Përfaqësuesja e Shqipërisë në Junior Eurovision 2025 është zgjedhur, dhe është pikërisht Kroni Pula me këngën “Fruta Perime”! Një titull që tingëllon si një këngë edukative për klasën e parë, por që këtë vit do të tentojë të përfaqësojë vendin në skenën e madhe evropiane për fëmijë.
Menjëherë pas publikimit të lajmit, rrjetet sociale shpërthyen me komente ironike, meme dhe zhgënjim. Komentues të huaj dhe shqiptarë kanë reaguar në mënyrë të drejtpërdrejtë: “Last place”, “Hard watch”, dhe “prediction: the whole stage will be filled with fruits” janë vetëm disa nga komentet që po bëjnë xhiron e TikTok-ut dhe Instagram-it.
Ndonëse Kroni është ende një fëmijë dhe përpiqet të japë më të mirën në këtë platformë ndërkombëtare, debati kryesor është ngritur mbi përzgjedhjen e këngës dhe përmbajtjen e saj. Teksti i këngës përshkruhet si një krahasim midis perimeve dhe frutave, të ziera apo të gjalla, gjë që shumë e kanë quajtur absurde për një skenë si Eurovision.
Shprehje si “të forta” dhe “të buta”, apo krahasimet mes frutave dhe perimeve “të gjalla” e “të ziera”, janë parë nga shumë ndjekës si nënkuptime me natyrë seksuale, një interpretim i padëshiruar, por që tregon se si një tekst i pafiltruar mirë mund të keqinterpretohet dhe të krijojë reagime të pakëndshme. Kjo ka ngritur shqetësime serioze për përmbajtjen që i serviret publikut të vogël dhe për mungesën e ndjeshmërisë nga ana e organizatorëve kur vjen fjala te përzgjedhja e materialeve artistike për fëmijë.
Komentet më nostalgjike kërkojnë rikthimin e performuesve të mëparshëm si Nicole Cabeli apo Eden Dani, ndërsa të tjerë parashikojnë një renditje të fundit për Shqipërinë, madje edhe para se të dëgjojnë të gjitha këngët konkurrente.
Nëse kjo këngë do të jetë një surprizë apo një dështim i paralajmëruar, mbetet për t’u parë. Por një gjë është e sigurt: “Fruta Perime” nuk ka kaluar pa zhurmë, dhe ndoshta kjo është gjysma e suksesit në Eurovision.
