Humbën vëllain e vetëm në aksident, vajzat i përgjërohen prindërve: “Jetoni për ne!”

Vajzat e familjes Mataj, Ana dhe Afrida i ishin drejtuar emisionit “Dua të të bëj të lumtur”, për t’i dhënë një mesazh prindërve të tyre. Jeta e Afërdita dhe Besnik Mataj kishte humbur kuptimin pas ndarjes nga jeta të djalit të tyre të vetëm në moshën 10-vjeçare, si pasojë e një aksidenti rrugor.

Përmes emisionit, vajza iu drejtuan prindërve: “E dimë se sa shumë jeni munduar ju për ne. E dimë se sa shumë keni sakrifikuar për ne. Ne ju duam shumë dhe ju jeni prindërit më të mirë në botë. Ne po ju kërkojmë sot që të jetojmë për të, të gjejmë një mënyrë për ta kaluar bashkë, për të qarë bashkë dhe për të patur mall bashkë. Ne kemi gjithçka sepse kemi njëri-tjetrin. Ne jemi vajzat tuaja, djemtë tuaj, ne jemi çdo gjë që ju do të donit të ishim. Prandaj le ta harrojmë dhimbjen dhe të nisim gjithçka nga fillimi”.

Me lot në sy, prindërit premtuan se do të ecin përpara për dy vajzat e tyre.

“Ne gjithmonë jemi munduar që të fshehim dhimbjen tonë sepse ishim një familje tepër e lidhur. Ne do të jetojmë për vajzat tona. Do të mundohemi me gjithë zemër për të ndryshuar dhe për të qenë sa më të lumtur. Nuk është e lehtë për askënd, por këto kanë qenë forca jonë dhe na kanë ndihmuar me çdo gjë”- u shprehën prindërit.

Pjesë e surprizës ishin edhe dy këngëtarët e preferuar të familjes, Sabri dhe Ermal Fejzullahun.