Horror në Pogradec! Qentë masakrohen dhe lihen të ngordhin, bashkia reagon pas denoncimit

Për të disatën herë në qytetin e Pogradecit po ndodh një fenomen skandaloz që arrin në kufijtë e krimit. Shoqata “Animal Rescue Albania” ka bërë së fundmi publik një rast që i ka shokuar të gjithë, jo vetëm banorët e qytetit liqenor. “ARSA Albania” ka publikuar në rrjete sociale një video, në të cilën shihen disa qenë të masakruar dhe të lidhur me zinxhirë, teksa janë lënë të ngordhin në mes të acarit.

Lexo edhe :

Për herë të parë në histori, britaniku Lando Norris shpallet kampion bote i Formula 1

16:22 07/12/25

Derbi Tirana – Partizani, policia njofton rrugët që do bllokohen

16:06 07/12/25

 

View this post on Instagram

 

A post shared by Animal Rescue Albania (@arsalbania)

Përgjegjës për këtë masakër është Bashkia Pogradec, që vit pas viti ka gjetur metoda të ndryshme për të zhdukur qentë endacakë. Edhe pak vite më parë qytetarët denoncuan bashkinë e qyetetit të Pogradecit, sepse vriste qentë duke hedhur proshuta të helmuara në rrugë.

Një veprim i tillë dënohet edhe me ligj sipas kushtetutës së Republikës së Shqipërisë. Ligji nr Nr.10 465, datë 29.9.2011 “Për Shërbimin Veterinar” përcakton qartë ndalimin e keqtrajtimit të kafshëve si dhe masat ligjore ndëshkuese për rastet e keqtrajtimit.

Në nenin 76, ligji në fjalë shkruan: “Për mbrojtjen e mirëqenies së kafshëve ndalohet kryerja e veprimeve të mëposhtme: a) shkaktimi i torturës, dhunës fizike dhe verbale, sjelljes çnjerëzore, frikës, dëmtimit, dhimbjes, vuajtjes, shqetësimit ose ankthit, me përjashtim të rasteve të lejuara sipas këtij kreu”

Neni 76 vijon me një sërë ndalimesh të tjera ndërsa neni 134 me titull “kundërvajtjet administrative” parashikon gjoba për rastet e shkeljes së këtij ligji, ku për shkeljet e nenit 76 parashikohet gjobë deri në masën 100 mijë lekë të rinj.

Pasi ky rast i tmerrshëm dhe skandaloz u bë publik, Bashkia Pogradec reagoi në rrjete sociale duke mos mbajtur përgjegjësi për fajin. Në postim thuhet se çështja ju ka kaluar organeve të drejtësisë për të zbardhur ngjarjen, por nuk shpjegohet se kush e bëri këtë krim ndaj kafshëve. Madje Bashkia Pogradec është distancuar nga akti makabër, duke u shprehur se asnjë individ nuk mund të cënojë imazhin e qytetit.