Një ngjarje historike u shënua mbrëmjen e djeshme për sportin shqiptar! Majlinda Kelmendi u shpall në Budapest, si xhudistja më e mirë në botë nga Federata Ndërkombëtare e Xhudos. Përpos falënderimeve, Kelmendi nuk ka mundur t’i mbajë lotët teksa shprehte mirënjohjen e saj për mbështetjen që presidenti i Federatës i ka dhënë Kosovës.
“Nder i madh të jem këtu. Kam disa fjalë për të thënë. Uroj të mos ju pengoj. Fillimisht dua të uroj presidentin për mandatin e ri. Faleminderit që e keni mbështetur Kosovën. Ju jeni arsyeja që Kosova është pranuar në Komitetin Olimpik. Falë jush, kam mundur të përfaqësoj Kosovën në Rio. Falë jush, Kosova ka medaljen olimpike”, shprehet kampionia.
E emocionuar, Majlinda nuk harroi të falënderonte trajnerin e saj dhe vëllezërit për mbështetjen gjatë gjithë kësaj kohe, duke shtuar se gjithmonë do të kujtojë se ishte Kosova vendi në të cilin ajo nisi rrugëtimin e saj të suksesshëm.
“Të gjithë e njihni historinë time. E kam nisur karrierën në Kosovë, kam fituar gjithçka. Por ky çmim sot, është ‘Everesti’. Nuk mund të kërkoj më shumë”, përfundon Kelmendi.
