Përgjatë pandemisë së COVID-19 në SHBA, kritikët e medias kanë paralajmëruar herë pas here se vendimet mediatike për të injoruar rrezikun nga koronavirusi, mund të kenë një kosto fatale.
Një studim i ri e ka vërtetuar një gjë të tillë.
Studimi i një grupi ekonomistësh kishte si fokus programet e gjigantit “Fox News” në shkurt dhe fillim marsi.
Në atë kohë, në programin e moderatorit Sean Hannity, rreziku nga koronavirusi shihej si inekzistent dhe injorohej ndërkohë që në studion e kolegut të tij, Tucker Carlson, audienca informohej rregullisht mbi rrezikun që u kanosej dhe masat që duheshin marrë.
Duke përdorur të dhënat e shikueshmërisë dhe sondazhet, studiuesit zbuluan se audienca e emisionit të Sean Hannity jo vetëm që ishin më pak të gatshëm të ndiqnin rregullat e distancimit social, por gjithashtu në zonat ku ata jetonin, kishte shifra shumë më të larta të infektuarish dhe viktimash krahasuar me ato ku banonin ndjkësit e emisionit të Tucker Carlson.
“Sipas të dhënave tona, krahasimi i audiencave ka treguar se ajo e Hannity kishte 30% më shumë raste me COVID-19 deri më 14 mars dhe 21 % më shumë viktima deri më 28 mars, krahasuar me audiencën e emisionit ku flitej mbi rrezikun e COVID-19.”-shprehen ekonomistët.
Studimi i tyre vijon ende të jetë në përpunim e sipër, megjithatë sipas “Vox.com”, ky studim konfirmon ndikimin masiv që media ka në sjelljet individuale, veçanërisht në rastin e “Fox News” që njihet si një ndër mbështetëset më të mëdha të Donald Trump.
