Ditën e djeshme, “Iconstyle.al” raportoi rastin e një pronari biznesi në Tiranë, i cili është solidarizuar me të prekurit nga tërmeti duke strehuar 110 persona në ambientet e biznesit të tij.
Pronari dhe bashkëshortja hapën dyert e biznesit të tyre, Qendrës “Egi Center” që ndodhet në rrugën “Teodor Keko”, por tashmë nuk po munden ta përballojnë dot të vetëm këtë situatë.
Flamuri shprehet se ka pranuar njerëz në nevojë nga “Fundjave Ndryshe” dhe “emisioni STOP”, por tashmë nuk mundet të shtojë numrin, megjithëse ka vend edhe për 50 persona të tjerë në nevojë.
Megjithëse ka bërë apel për ndihmë, askush nuk ka shkuar ende për ta ndihmuar pronarin.
Për më tepër, “Iconstyle.al” mëson se ndërtesa e biznesit të tij është në listën e ndërtesave që do të shemben për shkak të punimeve që do të vazhdojnë në zonën e “Unazës së Re”.
Pronari bën thirrje shtetit që ta marrë sa më parë objektin që është destinuar për t’u prishur, si dhe të kujdeset për personat e strehuar në të.
“Vetëm dje ka ardhur 3 herë ambulanca. Kemi frikën e ndonjë epidemie. Kemi nevojë për mjekë. Dje erdhën mjekë por u larguan sërish dhe përfaqësues të Ministrisë së Shëndetësisë na thanë se duhet të certifikohet qendra jonë! Nuk di ku të drejtohem!”.- u shpreh Flamuri, duke treguar se ka nevojë për dyshekë, batanije, ushqime e veshmbathje për 110 personat e strehuar.
“Kemi nevojë për ndihmën e shtetit! Duhet një kuzhinë për të ushqyer këta njerëz, shërbim, larje, pastrim. Çfarë të bëj unë i vetëm me gruan?! Për të mos përmendur dritat dhe uji që shkojnë 150 mijë lekë të vjetër në ditë. Hajde se ato po i paguaj, por kështu nuk shtyhet! U shkatërruam familjarisht!”.
“Iconstyle.al” vë në dispozicion një numër telefoni të pronarit (+355 68 207 0362) ,ndërsa ju bëjmë të gjithëve apel të ndihmoni me sa të mundeni!
