Nisin sot aktivitetin e tyre parukeritë, klinikat dentare dhe berberët. Gjithashtu edhe qendrat tregtare hapin dyert e tyre pas gati dy muajsh mbyllje.
Por jo çdo gjë do të jetë si më parë, por në kushte e rregulla tërësisht të reja.
Distancimi, dezinfektimi i duarve, përdorimi i maskave, mosgrumbullimi janë kushtet e reja, që duket se do të na shoqërojnë gjatë.
Nga sot zgjerohet dhe lëvizja e automjeteve pa autorizim brenda qarqeve, nga ora 5.00 deri në 17.30.
Ndërkohë 14 bashki të tjera i shtohen “zonave të gjelbra” dhe ato janë: Lushnjë, Patos, Korçë, Roskovec, Lezhë, Mirditë, Fushë-Arrëz, Malësi e Madhe, Kavajë, Vorë, Vau Dejës, Pukë, Has, Kukës.
Në të gjitha zonat e gjelbërta lejohet qarkullimi ndërqytetas me automjete privat deri në orën 21:00, i më shumë se dy personave të së njëjtës familje.
Po ashtu duke filluar që nga dita e sotme të gjithë të riatdhesuarit do të vetëkarantinohen në banesë.
Për berberët, parukeritë dhe klinikat dentare janë vendosur disa rregulla:
-Personeli i punësuar dhe personat e tjerë klientë duhet të përdorin në çdo moment dorezat mbrojtëse. Kujdes duhet treguar në prekjen e mjeteve të punës pas shërbimit të klientit. Fillimisht duhen dezinfektuar dorezat.
-Personeli i punësuar dhe personat e tjerë klientë duhet të mbajnë në çdo moment maskën mbrojtëse duke mbuluar hundën dhe gojën. Klienti që kryen trajtime të fytyrës mund të mos mbajë maskë, por duhet të sigurohet distanca më e madhe e mundshme klient-ofrues shërbimi dhe koha të reduktohet në maksimum. Rekomandohet përdorimi i maskave sa më profesionale apo mjekësore.
-Në hyrje, jashtë ambientit, çdo klient pajiset me veshje plastike (qese) njëpërdorimshe për këpucët, të cilat hidhen në kosh në dalje. Veshje plastike për këpucët përdorin edhe ofruesit e shërbimit nëse nuk përdorin këpucë/shapka të brendshme sterile.
-Në hyrje drejtuar direkt për në dhomën e zhveshjes, çdo klient që kryen shërbime të trajtimit trupor duhet të pajiset me veshje njëpërdorimshe, e cila hidhet në kosh.
-Karriget, poltronat, krevatet ku ofrohen shërbimet duhet të vishen me mbështjellëse letre të tipit roll-on me njëpërdorim.
-Peshqirët duhet të jenë të paketuar dhe të përdoren vetëm njëherë për çdo klient. Pas përdorimit hidhen në kosh të mbyllur të veçantë. Peshqirët duhen larë çdo ditë. Prekja e peshqirëve të papastër bëhet vetëm me doreza.
-Subjekti duhet të garantojë dhe respektojë në çdo moment distancën prej 2 metrash midis klientëve në çdo drejtim. Subjekti riorganizon vendosjen e vendeve të punës si karrige, poltrona, krevatë etj. Sipas një plani individual në mënyrë që të respektojë detyrimin e mësipërm. Në rast të pamjaftueshmërisë së hapësirës subjekti shërben aq klientë sa i lejon hapësira duke respektuar detyrimin e mësipërm. Në ambientet me hapësirë mbi 40 metra katrorë mund të lejohet proporcionalisht një klient tepër për çdo 10 metra katrorë shtesë ambienti duke riorganizuar vendosjen për ruajtjen e distancës midis klientëve.
-Subjekti shërben vetëm me prenotim online apo me telefon dhe nuk lejohet krijimi i rradhëve të pritjes në brendësi të ambientit apo jashtë tij.
https://www.instagram.com/p/CACUcD2H3Vk/
