Shtëpia e Vaçe Zelës në Tiranë është grabitur nga dosa persona ende të paidentifikuar.
Sipas GazetaSi, denoncimi u bë nga motra e ikonës së muzikës shqiptare, që kujdesej për banesën e së ndjerës.
Ndër sendet që janë vjedhur ishte edhe një dekoratë që i ishte dhënë këngëtares nga Presidenti i Republikës.
“Rreth orës 19:45 shkova në shtëpi si përherë dhe vura re se dera nuk ishte e kyçur, por u hap menjëherë sapo e preka. Hyra brenda dhe pashë rrëmujë, rrobat i kishin hedhur përtokë, ndaj menjëherë njoftova fqinjën në katin sipër që lajmëroi policinë”, ka thënë motra e këngëtares.
GazetaSi shkruan se një patrullë policore është afruar në banesën ku dikur ka jetuar Vaçe Zela, por pavarësisht këqyrjes së detajeve, nuk ka gjetur asnjë gjurmë nga grabitësit. Shpresat janë te një fije floku që është gjetur në banesë dhe është dërguar në laboratorin e kriminalitikës dhe mund t’i çojë tek autori apo autorët e dyshuar të vjedhjes.
Po ashtu janë kërkuar edhe kamerat e sigurisë në zonën rreth shtëpisë, por deri tani nuk është gjetur gjë. Ndërkohë, pas invetarit të kryer, motra e Vaçe Zelës ka thënë se veç dekoratës, janë vjedhur edhe sende të çmuara e kuti me bizhuteri.
