Një argjendari në qendrën tregtare “City Park” në autostradën Tiranë-Durrës ka rënë pre e një grabitjeje që në ditën e parë të vitit 2019. Ngjarja është shënuar në mbrëmjen e 1 janarit duke u gdhirë data 2.
Për publikun policia nuk ka dhënë asnjë njoftim. Policia e shtetit nuk ka bërë publike informacionet mbi ngjarjet, arrestimet, ndalimet dhe procedimet në 24 orët e fundit siç edhe e ka detyrim ligjor.
Nga uniformat blu thanë se 4 persona të maskuar kanë shkuar pranë kësaj qendre tregtare, kanë lidhur punonjësit e shoqërisë private të sigurisë dhe kanë hapur derën e argjendarisë “Altinbas”, ku kanë marrë të gjitha bizhuteritë prej ari dhe gurë të çmuar që kapin vlerën e 200 mijë eur. Punonjësit e policisë janë njoftuar më vonë nga rojet e biznesit dhe kanë bërë kqyrjen e vendngjarjes.
Si shenjë e prezencës së policisë në vendngjarje kanë mbetur vetëm shënime në xham ku janë siguruar disa gjurmë gishtash. Për këtë ngjarje materialet janë çuar për ndjekje penale me akuzën e shpërdorimit të detyrës punonjësit e shoqërisë private të sigurisë.
Kjo argjendari kishte dy pronarë dhe në një takim me njërin prej tyre z. Abdulla Frakulli u zbulua se kjo është hera e dytë që ky biznes grabitet.
Në 24 dhjetor të vitit 2013 banda e babagjyshëve e drejtuar nga Ilir Kupa grabit argjendarinë “Gelosia” në një qendër tregtare, e cila ishte në pronësi të Ibrahim Çaushit i cili është gjithashtu bashkëpronar në argjendarinë ku ndodhi grabitja në ditën e parë të janarit.
Burimi: Balkanweb
