Ndonëse ishte parashikuar më herët që gjykata do të hapin dyert më 27 prill, ky vendim nuk u zbatua asnjëherë dhe ende nuk ka një datë zyrtare se kur do të rinisin aktivitetin e tyre.
Burime për “gazetareforma.com” bëjnë me dije në to shqyrtohen vetëm çështjet emergjente dhe jo ato të themelit, çka ka krijuar një bllokim të ngjashëm me atë të Gjykatës së Lartë.
Dhoma e Avokatisë ka këmbëngulur që gjykatat të hapen sa më shpejt duke iu përmbajtur rregullave dhe masave parandaluese, por thirrja e tyre mesa duket paska rënë në vesh të shurdhër.
Mbyllja e gjykatave pas shpalljes së gjendjes së fatkeqësisë natyrore nga Kryeministri i vendit Edi Rama ka krijuar kaos jo vetëm tek qytetarët, por edhe tek ata që janë pjesë e sistemit të drejtësisë.
Por çfarë do të thotë kjo dhe si ndikon tek ne?
Mbyllja e gjykatave lidhet drejpërdrejtë me jetën tonë pasi nuk kemi ku të ankohemi dhe ku të kërkojmë të drejtën në këtë periudhë. Pra, që prej më shumë se dy muajsh, jemi të privuar nga mundësia për të kërkuar drejtësi në sallën e gjyqit.
Nëse një ditë të bukur, policia na bllokon makinën për shkak se nuk i kemi bindur dot se po lëvizim me autorizim, ose në rastin më të keq na bllokojnë patentën, ne nuk kemi ku të shkojmë që të ankohemi, pasi dyert e gjykatave janë të mbyllura.
Besoj kemi dëgjuar shumë raste që shumë punonjës janë pushuar nga puna në këtë periudhë pasi pandemia ndër të tjera po shkakton krizë të thellë ekonomike.
Po çfarë duhet bërë në këtë rast dhe si mund të zgjidhet halli i njerëzve që janë pushuar nga puna pa të drejtë dhe janë lënë në mes të rrugëve në këtë periudhë të vështirë?
Punonjësve për momentin iu është mohuar edhe e drejta për t’u ankuar dhe që të vendoset drejtësia për ta për shkak të mbylljes së aktivitetit të gjykatave.
Nëse po mendoni që ta çojnë çështjen pasi të hapen gjykatat, thjesht duhet të mendojmë pak se kushedi kur do të vijë radha e tyre për t’u trajtuar dhe që t’ju jepet zgjidhje, pasi kjo mbyllje e gjykatave nënkupton edhe grumbullim të jashtëzakoshëm të çështjeve dhe ka çështje të tjera më herët që po presin për zgjidhje.
Sakaq, kjo zvarritje e paarsyeshme përkthehet në një drejtësi të munguar për qytetarët, që prej më shumë se dy muajsh janë privuar nga mundësia për të kërkuar drejtësi në sallën e gjyqit, në një kohë kur thuajse çdo institucion tjetër ka rinisur punën.
