Gjiko dhe e dashura e tij Elita Rudi kaluan disa ditë pushime në Maldive. Reperi i njohur vendosi që ta festonte ditëlindjen e tij në një vend ekzotik dhe ku mund të kishte më mirë se sa në Maldive. Fotot e shumta që çifti postoi në rrjetet sociale na bënë që ta “xhelozonim” për faktin që nuk ishim ne aty.
Plazh privat, qetësi, darka romantike dhe një natyrë perfekte e adhurueshme nga të gjithë. Por pushimet e Gjikos duket se nuk kanë shkuar aq mirë sa u shfaq në rrjetet sociale. Ai postoi një foto në “Instagram” që me sa duket e ka futur në telashe.
Gjiko postoi në “Instagram” një foto, madje dhe video me një peshkaqen të vogël teksa e nxjerr nga deti dhe pas pak sekondash e riktheu në ujë. Në fakt dikush duhet ta kishte paralajmëruar reperin që peshkaqeni është specie e mbrojtur në Maldive.
Video-ja e publikuar nga Gjiko në “Instagram” është parë nga përdoruesit e rrjeteve sociale, të cilët të shqetësuar i janë drejtuar resortit Kuredu, ku çifti po pushonte. Personeli i resortit pasi ka parë pamjet filmike, iu ka kthyer përgjigje në “Facebook”.
“E kuptojmë shokun tuaj pasi kemi parë video-n, dhe mund t’iu sigurojmë qe dhe ne jemi tmerruar po aq shumë kur e kemi parë. Peshkaqeni u rikthye në ujë, megjithatë kjo nuk e justifikon sjelljen shokuese dhe mungesën e respektit të treguar. Personi në fjalë është vendosur në listën e zezë të resorit tonë dhe ne do të njoftojmë autoritet lokale nëse do ta vazhdojnë çështjen”, shkruhet në postimin e tyre në “Facebook”.
Gjikoja dhe Elita nga ana tjetër janë siguruar që ta fshijnë nga “Instagrami” foton me peshkaqenin, si dhe videon ku reperi nxjerr peshkaqenin nga deti dhe Elita brohoret.
