Me vetëhedhjen e 52-vjeçarit nga kati i katërt i Spitalit “Shefqet Ndroqi”, ditën e sotme, ka shkuar në tre numri i pacientëve me covid të vetëvrarë në vendin tonë.
Mjekja psikiatre, Arjana Rreli, ka shpjeguar se pacientët e përjetojnë edhe më rëndë sëmundjen, nëse nuk kanë vëmendjen apo praninë e të afërmve të tyre.
Ndër të tjera psikiatrja ka theksuar se dhe vetë sëmundja e koronavirusit është një sëmundje që ndikon në psikologjinë e të prekurve.
Gjithashtu mjekja thekson se autoritetet mjekësore duhet të merrnin masat e duhura në mënyrë që rastet e tilla të mos përsëriteshin dhe të mos përsëriten.
“Pasiguria ka ngritur mekanizma të ankthit dhe të panikut. Kurimi i kësaj sëmundje është i tillë që të gjendemi larg familjarëve në përballimin e një situate të tillë dhe kjo bën që ngarkesa psikologjike e pacientit mund të jetë e madhe duke çuar në një çrregullim të madh mendor.
Kjo është një sëmundje që prek sistemin e respiracionit dhe mungesa e oksigjenit në tru jep pasoja të rënda deri në komprementim të humorit dhe në vendimmarrje të tilla ekstreme”, është shprehur psikiatrja Arjana Rreli. /IconStyle.al/
