Modelja e njohur Gisele Bunchen ka folur për mënyrën se si e trajtoi përfundimin e martesës së saj me Tom Brady. Në një intervistë të re me Vogue, supermodelja 43-vjeçare tregoi se si e menaxhoi shëndetin e saj mendor gjatë divorcit nga ylli 46-vjeçar i NFL, i cili u finalizua në tetor.
“Gjithmonë kam besuar se çdo situatë, sado e vështirë të jetë, ka diçka për të na mësuar dhe ndodh që të na bëjë më mirë. Ndarjet nuk janë kurrë të lehta, veçanërisht kur media spekulon”
Dhe ajo vazhdoi: “Unë u përpoqa të fokusohem te fëmijët e mi, shëndetin tim, projektet dhe ëndrrat e mia”.
Çifti, i cili ishte i martuar për 13 vjet, ka një djalë Benjamin Rein, 13 vjeç dhe Vivian Lake, 10-vjeç. Brady gjithashtu ka një djalë Jack, 15 vjeç, nga një lidhje e mëparshme.
Në intervistë ajo ka folur edhe se si kujdeset për veten që të jetë plotësisht e shëndetshme.
“Ka tre gjëra që unë mendoj se janë thelbësore për t’u ndjerë mirë: të hani shëndetshëm, të ushtroheni çdo ditë dhe të gjeni kohë për të pushuar mendjen dhe trupin tuaj.”
Gisele foli sesi mësoi të vinte shëndetin e saj në plan të parë dhe të jepte shembull për të tjerët në industrinë e modelingut.
“Më është dashur të kaloj kohë të vështira për të kuptuar rëndësinë e zgjedhjeve të shëndetshme në jetën time dhe jam shumë e lumtur ta ndaj këtë sot. Nuk e shoh si përgjegjësi, por kam një dëshirë të madhe që mësimet e mia t’i ndaj me sa më shumë njerëz”.
