Alfred Lela u shoqërua me dhunë nga uniformat blu ditën e shembjes së Teatrit Kombëtar pasi tentoi t’u merrte nga duart ish-deputeten e LSI-së, Silva Caka, tre efektiveve që po e shoqëronin.
Gazetari pati edhe një përballje me kryeministrin Edi Rama pak ditë më parë, para të cilit në shenjë revolte hoqi pantallonat për t’i treguar dhunën që policia kishte ushtruar.
I ftuar në studion e lajmeve në Ora News, Lela pranoi se ky veprim nuk ishte etik, por tha se e bëri edhe për t’i treguar kryeministrit Rama që qeverisë i kanë rënë pantallonat.
Alfred Lela: Kryeministri po refuzonte çdo gjë dhe me cinizëm dhe arrogancë. Megjithëse duket pa etike, por kur bëhesh i pafuqishëm, në mungesë të një fuqie për ta thënë dhe për ta besuar dikush atë ngjarje detyrohesh të bësh një akt jashtë të zakonshmes. Por ishte dhe simbolike, për të thënë, ja fytyra e shtetit, e cila nuk mundet të marrë as përgjegjësitë përballë shtetasve të vet, të cilët i ka për detyrë t’i mbrojë. Edhe nëse dikush në depresion ose në një tronditje psikike shkon për të vrarë veten, shteti shkon për ta shpëtuar. Edhe nëse ne ishim fajtorë, shteti duhet të na mbronte. Ishte simbolike gjëja, që shtetit i kanë rënë pantallonat. Për të thënë që ju jeni pa pantallona sepse dilni në mes të natës për të shembur një ndërtesës që është e shtetit, e shqiptarëve. E kanë ndërtuar pushtuesit dhe e shembin çlirimtarët po themi.
https://www.instagram.com/p/CAdzpkTgrAC/
Lela tha se policët nuk e njohën që ishte gazetar, por iu duk sikur ishte ndonjë nga ata të fortët që bëjnë si të pakapshëm.
Ai u shpreh se shoqërimi ishte shtazarak dhe kjo ishte arsyeja përse ai ka ngritur një ankesë për efektivët. Lela pranoi se cënoi hapësirën e efektivëve duke thyer kordonin e krijuar por nuk e meritonte një dhunë të tillë, që u shoqërua me shembje nga goditjet me këmbë në kokën e tij.
/Iconstyle.al
