Ministria e Shëndetësisë ka bërë me dije sot se janë identifikuar 8 raste me COVID-19 në vendin tonë në 24 orët e fundit.
Shpërndarja gjeografike e rasteve është si vijon: 5 raste në Tiranë, 2 në Durrës dhe 1 në Krujë, të gjitha kontakte të rasteve të mëparshme pozitive. Të shëruar janë 6 qytetarë, ndërsa nga fillimi i epidemisë janë kryer mbi 14 mijë testime molekulare dhe serologjike.
Deri më sot janë konfirmuar pozitivë 989 qytetarë me COVID-19. Prej tyre, rreth 79% janë të shëruar. Aktualisht në spitalin e Infektivit janë të shtruar 16 pacientë, 5 prej të cilëve janë në terapi intensive. Gjithsej janë 175 raste aktive me koronavirus në vendin tonë!
Lajmi i mirë është se prej më shumë se 3 javësh nuk ka shtim të numrit të viktimave.
COVID-19 – Statistika (23 Maj 2020)
Testime totale 14459
Testime molekulare 13133
Testime serologjike 1326
Raste pozitive 989
Raste të shëruara 783
Raste Aktive 175
Humbje jete 31 (Qarku Tiranë 18, Durrës 6, Fier 3, Vlorë 1, Shkodër 2, Kukës 1)
Shpërndarja gjeografike e rasteve aktive është si vijon:
Tiranë 62
Durrës 50
Krujë 27
Shkodër 10
Berat 10
Kamëz 9
Fier 4
Elbasan 1
Mirditë 1
Korçë 1
Ndërkohë, nga 19 raste të reja me koronavirus në Prizren, 12 prej tyre janë uniforma blu. Lajmin e ka konfirmuar për Telegrafin, zyrtari për informim i Policisë së Kosovës për rajonin e Prizrenit, Shaban Osmanollaj.
Me rastet e fundit të konfirmuara në Prizren numri i personave të infektuar ka arritur në 121, ndërsa gjithsej në Kosovë janë 1 mijë e 25 persona që janë prekur nga virusi COVID-19.
Më shumë se 5.2 milion njerëz në mbarë botën janë konfirmuar me koronavirus, sipas të dhënave të përpiluara nga Universiteti Johns Hopkins. Më shumë se 338,000 njerëz kanë vdekur globalisht ndërsa rreth 2 milionë njerëz janë shëruar.
Për herë të parë që kur filluan raportimin e të dhënave në janar, autoritetet kineze regjistruan zero infeksione të reja të koronavirusit.
Brazili konfirmoi një total prej 330.890 raste të koronavirusit të premten, duke kapërcyer Rusinë për t’u bërë i dyti në botë për numrin e të infektuarve me COVID-19.
/Iconstyle.al
