Jam një tip që fiksohem pas vetes. Domethënë, me atë rrudhën që më ka dalë në mes të vetullave apo asimetrinë e fytyrës. Çështje që ndoshta nuk jam e vetmja që më torturojnë, por dëshiroj që të bëj gjithmonë diçka për to. Nga ana tjetër kam frikën e bisturisë apo botoksit, pasi mendoj se ka kohë për to, ndoshta kur të arrij të 60-at.
Fiksimi im i këtij viti ishin buzët e vogla dhe më duket sikur nuk koordinojnë me tiparet e tjera të fytyrës. Okej, Nëna Natyrë i ka fajet, por falë Zotit apo duhet të them “falë” Kylie Jenner, kisha një ide se çfarë mund të bëja me to.
Fiksohesha përreth një muaj në fytyrën e çdo femre, te shoqet, koleget e punës, në lokal apo në autobus si i kishte, i shkonin apo jo, si do të dukesha po të kisha të sajat. Nuk besoj se e bëj vetëm unë këtë gjë, por unë po marr mundimin dhe po e shkruaj, pavarësisht se mbetem një anonime.
Mendoj se ndoshta u fokusova te buzët, sepse në bazë të standardit të sotëm të bukurisë, ato duhet të jenë të mëdha dhe mishtore. Sepse sa herë që hapja Instagram-in më shfaqej një vajzë me buzë perfekte, pavarësisht se kishte përdorur mbushës apo makijazh.
Dhe brenda 1 viti vendosa që të zmadhoja buzët dy herë, por në klinika të ndryshme. Herën e parë mbeta shumë e zhgënjyer, buzët dukeshin super të fryra dhe shumë artificiale.
Gabimi? Doktori nuk pyeti në asnjë moment për kërkesat e mia dhe ishte shumë neglizhent, ndërsa unë kalova disa ditë duke qarë. Por doktoresha e dytë, e cila ishte e specializuar për këtë proces, më tha se rezultati i parë mund të ishte më i suksesshëm nëse do të insistoja për kërkesat e mia.
Bëmë një studim të fytyrës sime dhe isha e lirshme për t’i bërë pyetjet që kisha në mendje. Vendosëm që mos të bënim shiringën me përbërës Juvederm, e cila ishte ajo që bëra herën e parë, që u vendos e gjitha në buzë, ndërsa në herën e dytë një pjesë e injeksionit u përdor në lëkurën përreth buzës.
Nëse je në të njëjtën dilemë si unë, atëherë merr parasysh këto gjëra para se të bësh mbushës për buzët:
Sa të mëdha i do?
Gabimi im i parë ishte që nuk kisha vendosur një kufi ose nuk ika me një ide për madhësinë e buzës që doja, por gjithçka u la në dorën e doktorit. Në fakt duhet të vendosim ne sesa të mëdha duam që të duken buzët, sepse është më mirë të injektoni pak sesa shumë.
Në këtë mënyrë do të vendosni ju për sasinë e mbushësit (matet me mililitër), që doni të vendosni te buzët. Një javë përpara se të kryeni procedurën duhet të mos pini aspirinë, vaj peshku, multivitamina dhe vitaminë E, pasi mund të të hollojnë gjakun.
Mos i trego kurrë foton e Kylie Jenner
Gabimi prej të cilit e pësova kur kreva për herë të parë procedurën ishte se, përmenda emrin e Kylie Jenner. Jo, mos e bëj KURRË! Ose më keq t’i tregoni një foto të sajën doktorit. Kjo sepse anatomia e gjithsecilit është e ndryshme dhe kemi forma të veçanta buze. Më mirë ta sqaroni çfarë doni apo ta zbuloni këtë bashkë me doktorin.
Mbushës të ndryshëm japin rezultate të ndryshme
Iku koha kur kolagjeni ishte e vetmja zgjedhje. Ditët e sotme ka kaq shumë mbushës të lëkurës që bazohen në acidin hialuronik, një substancë që ndodhet në trupin tonë. Për të mos përmendur që substanca është goxha rezistente ndaj gungave.
Po zgjedhjen për këtë lërjani mjekut tuaj. Një pamje e re, e butë dhe voluminoze arrihet me Juvedermin, ndërsa Restylane përdoret për buzë më të plota, që nuk do t’i dallojë askush. Volbella është e mirë për të mbushur linjat rreth fytyrës.
Sa kushtojnë në Shqipëri?
Është mirë që të zgjidhni klinikën estetike me mjek më profestionistë. Çmimi për një proces të mbushjes së buzëve shkon nga 100 në 200 euro. Nuk është e shtrenjtë, por është më mirë të paguani më shumë sesa të zgjidhni variantin më të lirë dhe jo cilësinë.
Nuk janë përgjithmonë
Ato zgjasin nga rreth 6 muaj në një vit, në bazë të metabolizmit. Nëse pëlqen rezultatin e parë, atëherë bëni disa foto para se buzët t’ju bien.
Po nëse nuk më pëlqejnë?
Ka dy zgjidhje! Atë që mora unë, provova një doktor tjetër ose të ktheheni te i njëjti vend dhe t’i thoni që t’jua heqë mbushësin.
Të gjithë mbushësit (Restylane, Belotero, Volbella, Voluma, Juvederm) përmbajnë acid hialuronik, kështu që të gjithë mund të shpërbëhen me hialuronidazë, një enzimë që e shkrin shpejt dhe në mënyrë të sigurtë.
