Është e dhimbshme, por ndonjëherë thjesht nuk ke ç’ti bësh! Për arsye nga më të ndryshmet, duke filluar nga mungesa e parave, e duke përfunduar tek mungesa e njerëzve, fati e deshi që këtë vit t’i lani me lot pushimet në plazh. Ndonjëherë, jeta është thjesht mizore, por jo çdo gjë është e humbur. Ndaj sot “iconstyle.al” ju sjell 7 opsione veprimtarish për të bërë në qytet, që ta harroni faktin që nuk jeni në bregdet duke pirë një mojito (na falni që jua rikujtuam!).
1.Shkoni në pishina
Nëse plazhi thjesht nuk është një opsion, veçanërisht prej largësisë, atëherë pishinat janë alternativa më e mirë për të marrë disa rreze dielli e për t’u freskuar në ditët e nxehta kur qyteti është boshatisur.
2.Bëni nxirje artificiale
Një prej traumave të të mos vajturit në plazh është kthimi i gjithë atyre që kishin mundësi të shkonin, me një lëkurë ngjyrë çokollatë. Nëse e urren kontrastin e lëkurës tënde me atë të shoqeve të tua plazhiste, shtiru sikur e ke bërë dhe t’i 15-ditëshin tënd në bregdet me nxirës artificialë që mund t’i bëni në sallone bukurie në formën e spray-t që qëndron rreth 2 javë, ose në kushte shtëpie me kremra.
3.Dilni për shopping
Nëse paratë nuk janë arsye për mungesën e pushimeve, atëherë nuk ka terapi më të mirë për të kaluar mërzinë sesa një dozë e mirë shopping-u. Shfrytëzoi dhe uljet e para të sezonit për të rinovuar gardërobën dhe është e sigurt që do të ndiheni më mirë.
4.Shijoni jetën e natës
Në Jalë mund të jetë duke u bërë nami, por në korrik dhe në gusht, edhe Tirana nuk është aspak keq. Club-et dhe lokalet e natës vijojnë të jenë të mbushura me njerëz dhe nëse ndonjë prej shokëve apo shoqeve tuaja ka mbetur gjithashtu në qytet, mund të dilni fare mirë për t’u argëtuar në mbrëmje.
5.Ha ç’të të dojë qejfi
Nëse pjesa më e madhe e njerëzve shqetësohen për regjimin e tyre ushqimor përpara verës me merakun se si do të duken me rroba banje në plazh, ky mesa duket nuk ka përse të jetë shqetësimi juaj. Filloni të eksploroni restorantet që keni dashur gjithnjë të provoni në Tiranë, për të provuar pjata të reja dhe nëse është thjesht shumë vapë për të dalë nga shtëpia, keni gjithnjë opsionin e porositjes online me “SnapFood”.
6.Shfrytëzoni aktivitetet e qytetit
Ashtu siç është paralajmëruar prej disa javësh, Tirana këtë verë do të gëlojë nga aktivitetet artistike. Në sheshin “Skënderbej” pritet të mbahen koncerte të shumta me emra të njohur të muzikës ndërkombëtare dhe asaj shqiptare dhe më e bukura është se përveç rreshtave të parë, më përgjithësi nuk të duhet një biletë dhe gjithçka është falas. Opsione të tjera gjithashtu janë teatrot dhe kinematë.
7.Zhvilloni pasionet tuaja
Sporti, gatimi, fotografia… Thuajse të gjithë kemi një pasion për të cilin kemi brerje ndërgjegjeje sepse nuk gjejmë kurrë kohë apo mundësi për ta zhvilluar. Ndaj nëse këtë verë keni disa ditë pushimi të cilat nuk mund t’i shfrytëzoni në plazh, përkushtojuni këtyre pasioneve dhe është e sigurt që nuk do t’ju duken ditë të çuara dëm.
