Këtë sezon, kush i la lekët në skedina dhe s’ka terezi për pushime, mos të shqetësohet. Ka emisione plot që i kanë hyrë me kamera gjithë zonave turistike; nga Llogaraja deri në Ksamil, nga Vlora gjer’ në Velipojë, për t’ua servirur plazhin në ekran, pa ju harxhuar fare.
Zonat bregdetare janë shndërruar në atraksionin e preferuar të televizioneve tona. Por, programi që prej vitesh është shndërruar në ritualin e pasditeve të verës, “Edicioni Veror” në “ABC News”, këtë vit premton të jetë më i freskët se kurrë!
Prej 16 korrikut, gazetari Eni Shehu rikthehet çdo ditë, nga e hëna në të hënë, drejpërdrejt nga studioja verore e “ABC News” në Drimadhes.
Pjesë e tij do të jenë festivalet e shumta që do të mbahen në Jug këtë verë si dhe personazhet publikë më të komentuar, të cilët gjatë verës shpërngulen në bregdet.
Nga ana tjetër, pritet të zbulojmë bukuri krejt të panjohura bregdetare e malore. Sigurisht, bashkë me një guidë sesi mund të shkojmë atje, ku mund të akomodohemi apo ku të gjejmë ushqimin më fantastik.
Por, Eni Shehu nuk do të jetë vetëm pasi këtë herë, ka marrë jo pak përforcime. Drejtuesi prej 6 vitesh i “Edicionit Veror” konfirmoi në Instagram se krah tij do të jenë dy figura të reja në ekran, edhe pse jo të panjohura për publikun.
Për herë të parë në ekranin e “ABC News” do të shikoni Genta Hodon, në rolin e gazetares që do t’ju zbulojë të fshehtat e personazheve interesante të Drimadhesit, si edhe sekretet e bukurisë dhe stilit të plazhit.
Me gjasë, e mbani mend si prezantuese në prapaskenën e “Këngës Magjike” në vitin 2017.
Nga ana tjetër, blogerja e udhëtimeve Fjorda Llukmani, do të ketë në dorë të tregojë rrugën drejt mrekullive e pazbuluara të natyrës shqiptare.
Udhëtimet e Fjordës do të jenë plot personazhe të pazakontë, të cilët do t’ju provojnë se mund të jetohet edhe pa telefonë, qendra tregtare apo supermarkete.
“Edicioni Veror” nisi në 2012-ën dhe që atëherë, është kthyer në një prej emisioneve të preferuar verorë në televizionet shqiptare dhe i pari me një redaksi që raporton pikërisht nga vendi ku të gjithë do të donin të ishin gjatë verës: Në plazh!
E ndërsa Eni Shehu është kthyer tashmë edhe në personazh më vete që ka frymëzuar edhe humoristët e “Portokallisë”, nuk ka qenë gjithmonë kështu siç e shikoni sot.
“6 vite më parë isha ky tipi. Atëherë as që e imagjinoja se “Edicioni Veror” do arrinte suksesin që ka sot.”- shkruan ai në Instagram.
