Pak nga pak duket se epiqendra e COVID-19 do zhvendoset në SHBA, e cila brenda pak ditësh u rendit e para në rang botëror për numrin e të infektuarve dhe deri tani janë regjistruar 3, 580 viktima dhe 180,789 të prekur.
Në New York situata duket shumë serioze dhe sipas ekspertëve pritet që të konsiderohet si ‘Uhani i dytë’, teksa mes viktimave janë edhe tre shqiptarë.
Njëri prej viktimave është një 29-vjeçar dhe në një lidhje me Skype për Vizion Plus, gazetarja shqiptare Kozeta Turishta ndau të dhënat më të fundit sa i përket shtetit të New York-ut duke theksuar se situata atje është dramatike.
“Tre shqiptarë janë viktima në New York , një djalë i ri 29 vjeç ka vdekur 2 dite më parë. Ishte martuar pak muaj dhe ka ndërruar jetë. Një shqiptar pak më parë se të lidhesha me ju më njoftuan që në New Jersey ka humbur jetën dhe familjaret nuk e përcjellin dot në banesën e fundit. Mikesha ime më e mirë është e infektuar nga koronavirus dhe ka shumë shqiptarë të tjerë të prekur, që kanë simptoma dhe nuk janë simptoma si të gripit te thjeshte janë më komplekse”, – përfundoi Kozeta.
Gazetarja shqiptare e cila prej disa vitesh është shkëputur në Shtetet e Bashkuara të Amerikës, u shpreh se New York, është gjunjëzuar tashmë nga COVID-19 , duke i cilësuar shifrat e fundit si bilanc lufte.
“ Unë jam në New York, jam në karantinë dhe situata është tepër kritike. New York-u është epiqendra e COVID-19. Bilanci është bilanc lufte. 67 mijë të infektuar 900 te vdekur nga virusi në New York dhe ndërsa në Amerike janë më shumë se 3 mijë të vdekur. Brenda 24 orëve kanë vdekur më shumë se 100 persona. Situata nuk është fare e mirë. Nëse del në rrugët e New York është e frikshme. Spitalet janë të tej mbushura. Presidenti Trump, solli anijen spitalore të katërt e cila duket sikur të jep një shpresë. Ky virus është një armik i padukshëm”, u shpreh Turishta.
Deri tani janë shënuar 41, 237 viktima dhe 836, 894 të infektuar në 201 vende në të gjithë botën. /gazetareforma
