Pavarësisht se nuk është më trajneri i Kombëtares sonë, Gianni De Biassi ka dhënë një koment në përfundim të ndeshjes. Gjatë një prononcimi për mediat, De Biassi është shprehur se ka ndjerë dhimbje pasi tashmë ndeshjen nuk e sheh më nga pankina, por nga tribuna.
Ish-trajneri i Kombëtares shqiptare ishte i parë që komentoi suksesin e parë të Panucci-t.
Ai u shpreh se Shqipëria ka pasur mundësi për të shënuar golin e tretë, madje duke e njohur mirë skuadrën e kuqezinjve, pasi e ka drejtuar për 5 vite me radhë, ai kishte parashikuar edhe rezultatin e ndeshjes, 3-0.
Gjithashtu, De Biassi është pyetur nëse i ka dhënë këshilla trajnerit të ri të djemve, por ai u përgjigj me shaka se e vetmja gjë që i ka thënë ishte të fitonte të gjitha ndeshjet.
“Ndjeva një dhimbje të lehtë kur e pashë stolin nga larg, por për fat të mirë tani është Panucci aty dhe unë jam i kënaqur. Më vjen keq që nuk e gjeta dot rezultatin 3-0, mungoi vetëm një gol. Por gjithsesi mund të kishin shënuar më shumë se kaq. Nuk i dhashë asnjë këshillë Panucci-t, thjesht i thashë që të fitojë sa më shumë ndeshje”, tha De Biasi për Supersport
