Edicioni i 15-të i Tirana International Film Festival (TIFF) nisi mbrëmjen e së premtes, me një prodhim shqiptaro-britanik, të regjisorit Fatmir Koçi, dhe i realizuar në 3 gjuhë, shqipt, serbisht dhe anglisht.
“Elvis Walks Home” (Elvisi kthehet në shtëpi), u shfaq për herë të parë në Shqipëri, një muaj pas premierës në Festivalin e Filmit në Montreal. Filmi sjell historinë e një shqiptari në vitet 1999, vite të cilat e gjetën Ballkanin në luftë.
Mickey (Dritan Kastrati), një djalosh i ri që kishte lënë Shqipërinë për të ndjekur ëndrrën e tij në Angli, ku punonte si imitues i këngëtarit Elvis Presley, kthehet në Sarajevë për një koncert. Por fakti që kishte një pasaportë shqiptare, bëri që forcat e policisë të vihen kundër tij, ndaj dhe Mickey arratiset në një zonë lufte aspak të sigurt për jetën. Ai më pas takon një grup fëmijësh që janë të armatosur por kanë nevojë për dikë që t’i shpëtojë nga lufta. I frikësuar, Mickey hiqet si një doktor i United Nations (Kombeve të Bashkuara) dhe kujdeset për fëmijët e plagosur nga lufta. Ai sakrifikon edhe jetën për ta, por gjithmonë duke mos lënë pas ëndrrën e tij për muzikën dhe Elvis Presley-n.
Përse nuk duhet humbur ky film:
Historia e Mickey-t mbart me vete fatin e çdo shqiptari me ëndrra që nuk mundi t’i realizojë gjatë viteve të luftës, kur Ballkani ishte i përfshirë nga tensione. Personazhi sjell një të ri në kërkim të identitetit dhe në përballje me vuajtjen që i ka rrënjët te historia.
Humor. Situata sado e dhimbshme kishte një ndjenjë të hollë humori që i jepte dritë errësirës. Falë aktrimit të fëmijëve dhe natyrës së tyre naive, na bëjnë të qeshim sadopak me përpjekjen e tyre për të folur anglisht dhe batuta të tipit: “Me hahet bukë”!
Ka aksion Filmi përfshin skena të mirëfillta lufte me armë, dhunë, dhe momentin final kur Mickey përpiqet të ndalë zjarrin për të shpëtuar fëmijët që ndodhen në çadrat e Kombeve të Bashkuara.
Aktorët e njohur. Emra të njohur të kinematografisë shqiptare janë pjesë e këtij prodhimi shqiptaro-britanik, ku mund të përmendim aktorin Dritan Kastrati, Romir Zalla, Amos Zaharia, Erand Hoxha, Sara Kapo etj.
