Një vajzë vetëm 8 vjeç humbi jetën në mënyrë tragjike më 4 Korrik në Kaliforni, pas një incidenti të shkaktuar nga fishekzjarrë të paligjshëm.
Sipas policisë së Buena Park, ngjarja ndodhi rreth orës 21:45, teksa oficerët patrullonin zonën për shkak të përdorimit të shtuar të fishekzjarrëve. Ata vunë re anëtarë të një familjeje që po mbanin me panik një fëmijë të plagosur duke hyrë në një banesë. Vajza, e cila më vonë u identifikua si Jasmine Nguyen nga Anaheim, kishte pësuar dëmtime të rënda si pasojë e një shpërthimi. Ajo u transportua menjëherë në spitalin UCI, ku fatkeqësisht u konfirmua vdekja e saj.
Hetimet paraprake zbuluan se një banor i lagjes kishte organizuar një spektakël të madh me fishekzjarrë të paligjshëm, të cilët nisën të devijonin drejt shtëpisë ku ndodhej Jasmine. Kjo çoi në një varg shpërthimesh dhe në një moment, njëri prej tyre goditi vajzën duke i shkaktuar plagë fatale. Fatmirësisht nuk u raportuan dëmtime të tjera në ngjarje.
Autori i dyshuar, Earl Decastro, u arrestua nën akuzën për vrasje nga pakujdesia, por më pas u la i lirë me kusht. Prokuroria e Qarkut Orange po shqyrton materialet për ngritjen e akuzave zyrtare.
