Reperi i njohur Fero ka përfunduar sërish para gjykatës, këtë herë për të tjera akuza. Ai është shpallur fajtor pasi goditi me duar në shpinë të dëmtuarin A.A i cili më pas ishte detyruar të kërkojë ndihmë mjekësore në Emergjencën e Spitalit Regjional në Gjilan.
Pasi prokurorja Huma Jetishi lexoi atakuzën, Fero ka pranuar fajësinë, duke thënë se është pajtuar me të dëmtuarin Abazi dhe se i ka kërkuar falje, raporton “Betimi për Drejtësi”.
Prokurorja nuk e ka kundërshtuar pranimin e fajësisë. Gjyqtari i vetëm, Veli Kryeziu më pas e ka aprovuar pranimin e fajësisë për veprën penale të kryer.
Kryeziu shtoi se pranimi i fajit mbështetet në faktet e çështjes që përmban aktakuza dhe se aktakuza nuk përmban asnjë shkelje të qartë ligjore ose faktike.
Pas pranimit të fajësisë nga Fero, prokurorja i propozoi gjykatës që me rastin e caktimit të llojit dhe masës së dënimit të merren parasysh të gjitha rrethanat lehtësuese dhe rënduese.
Në aktakuzë thuhet se më 20 gusht 2021, ne rrugën e “Malishevës” në Gjilan, i pandehuri Feronit Shabani (Fero) pas një mosmarrëveshje me të dëmtuarin A.A, me dashje i ka shkaktuar lëndime trupore. Fillimisht i pandehuri ka ndalur makinën para të dëmtuarit dhe pas një konflikti me fjalë, ka dalë nga makina dhe e ka goditur me duar në shpinë.
Për shkak të lëndimeve i dëmtuari ka kërkuar ndihmë mjekësore në Emergjencën e Spitalit Regjional në Gjilan. Në raportin mjekësor lëndimet e tij janë klasifikuar si dëmtime të lehta trupore me pasoja të përkohshme për shëndetin.
