Seriali që kemi zgjedhur për t’jua rekomanduar këtë të hënë, do të kënaqë femra dhe meshkuj bashkë!
Femrat sepse vdesin për djemtë e këqij pas të cilëve tërhiqen gjithnjë dhe djemtë sepse argëtohen shumë me historitë e familjeve mafioze dhe filmat aksion.
“Peaky Blinders” është një ndër serialet më influencues në mbarë botën, që tregon historinë e një familjeje gangsterësh e vendosur në vitin 1919 në Birmingham, dhe shefit të saj badass, Tommy Shelby i portretizuar nga Cillian Murphy.
Tommy është një veteran i Luftës së Parë Botërore që e përndjekin makthet e luftës çdo natë. Ai është bosi i madh i familjes që është përfshirë në aktivitete të ndryshme të paligjshme (baste dhe tregti e zezë). Tommy sheh një mundësi për të zgjeruar fuqinë e familjes së tij, kur i bie në dorë një sasi e madhe armësh, vendndodhja e të cilave nxit Winston Churchill – asokohe një zyrtar i ri qeveritar – të dërgojë Kryeinspektorin Neill Campbell (Sam Neill) për t’i tërhequr ato.
Tommy nis planet për të përfituar nga kontrabanda, por Campbell, ka planet e tij të fshehta që përfshijnë edhe një femër bjonde super tërheqëse (Annabelle Wallis) e përdorur si agjente e fshehtë për t’i shkrirë zemrën e ngurtë gangsterit.
Të gjithë duan të dëgjojnë një histori për mafian!
Shelby-t janë një familje e njohur në Birmingham, me në krye Tommy-n, dhe anëtarët e tjerë të familjes që e bëjnë edhe më interesantë historinë. Tommy mund të jetë shefi, por askush nuk bën gjë pa mendimin e hallës Polly, një grua beqare dhe e fortë që merret me financat e familjes. Më pas janë vëllezërit e tij, Arthur (një gangster kokëkrisur) dhe John (një Shelby i pamatur që ndjek bizneset e familjes); si dhe Ada motra e tyre që është e tërhequr nga bizneset e paligjshme dhe merret vetëm me anën ligjore. Ajo është e ve dhe ka një djalë.
Histori e vërtetë?!
Skenaristi britanik Steven Knight e mori frymëzimin për historinë nga tregimet e babait të tij për bandat “jashtëzakonisht aktive” në Angli (edhe pse jo kriminale siç i shohim në serial), kur ai shpiku familjen Shelby, anëtarët e së cilës mbanin thika të qepura në kapelet e tyre Beret, ishin të veshur bukur dhe me stil.
Për sherr apo për pub, gjithmonë vishen bukur!
Nuk ka rëndësi nëse po përgatiten për sherr apo për të pirë një gotë në pub, Peaky Blinders janë gjithmonë të veshur për sukses. Kostumet e tyre serioze, pardesytë e gjata dhe kapelet që mbajnë thika të fshehura brenda (prej nga është marrë dhe emri Peaky Blinders), janë jo vetëm tepër funksionale në rastin e një sulmi të papritur, por edhe seksi.
Ka një super kast!
Sikur të mos mjaftonte super kasti i përzgjedhur për familjen Shelby, seriali sjell herë pas herë miq (ose armiq) të njohur si Tom Hardy (në rolin e Alfie Solomons, një udhëheqës i një bande hebreje); Aidan Gillen; Adrien Brody apo Sam Claflin.
“By the order of The Peaky fucking Blinders”
Theksi britanik dhe shprehitë e filmit, të bëjnë për vete dhe shtyjnë të përsëritësh në çdo episod shprehjen e famshme të tyre, “By the order of The Peaky fucking Blinders”.
Megjithatë edhe nëse e di mirë anglishten, ju këshillojmë ta shihni me titra, pasi vështirë të kuptosh gjë!
Sot në Britani është rritur ndjeshëm edhe numri i fëmijëve që mbajnë emrat kryesorë të serialit, Tommy, Ada dhe Arthur.
A dini se….
Këngët e serialit “Peaky Blinders” janë një krijim i artistëve më modernë. Seriali në vetvete ka muzikë të emrave të njohur si Arctic Monkeys, Nick Cave dhe The Bad Seeds, PJ Harvey, The Black Keys dhe Royal Blood.
Fansat më të mëdhenj të Peaky Blinders janë të famshmit si Steven Spielberg, Michael Mann, Brad Pitt dhe Tom Cruise dhe gjejeni pak kush tjetër…Snoop Dogg.
Reperi madje ka krijuar koverin e kolonës zanore “Red Right Hand” të Nick Cave.
Nëse doni një arsye bonus për ta parë, seriali ka një numër të madh skenash seksi (thuajse në çdo seri). Kaq kishim!
/Iconstyle.al
