“Stinë pandemie” titullohet libri më i ri i shkrimtarit të mirënjohur shqiptar, Fatos Kongoli. Si asnjëherë tjetër Kongoli ka përshkruar në romanin e tij të gjitha çështjet aktuale, që i kanë tërhequr vëmendjen muajt e fundit. Duke kombinuar humorin me ironinë e hollë, Kongoli shpreh hapur shqetësimin për indiferencën e popullit shqiptar ndaj problematikave të përditshme dhe mungesës së solidaritetit.
Në “Stinë pandemie” shkrimtari risjellë personazhet nga vepra e tij më e njohur “I humburi”, duke i vendosur në realitetin e sotëm dhe për të treguar se ç’ndodhi me ta në 30 vite demokraci.
Ironia therëse me indiferencën e shqiptarëve
“Ajo që më shqetëson fort dhe që kam dashur ta vë në dukje, është indiferenca e publikut për çdo gjë që ndodh. Indiferenca është një problem shqetësues. Ka indiferencë ndaj korrupsionit të bujshëm sot, ka indiferencë ndaj asaj që ndodh përreth nesh, ka indiferencë ndaj fateve të të tjerëve dhe mungon solidariteti”, është shprehur Kongoli në një bisedë mbi librin e tij në “News 24”.
Për këtë gjë shkrimtari është ndalur në dy momente, tek prishja e një lagjeje buzë lumit dhe tek përplasja e banorëve në Astir me policinë. Për këtë të fundit ai ka përdorur termin “blitzkrieg” (luftë rrufe që ishte në themel të ushtrisë hitleriane), për të vënë në dukje mënyrën se si policia u soll me banorët që jetonin atje prej vitesh.
“Për këtë kam ndal në dy momente; momentin e prishjes së një lagjeje (buzë lumit). Televizionet kanë pasqyruar ngjarjen, se si në 5 të mëngjesit policia u sul barbarisht, duke i përzënë nga shtëpitë ata banorë gjynahqarë me gaz lotsjellës. Me lëndë helmuese ushtarake. Këtë ngjarje e kam trajtuar me ironi, pasi mendoj se dikush në të ardhmen sipas meje duhet të jap llogari, se ç’u bë me ta. Faktet janë aty të gjitha. Pastaj, është dhe momenti i dytë; kur qytetarët përplasen në Astir me policinë, këtë e kam quajtur blitzkrieg-nazist (lufta rrufe që ishte në themel të ushtrisë hitleriane)”, ka shpjeguar Kongoli gjatë promovimit të librit.
Ndërhyrja e politikës në kulturë dhe Demokracia karikaturë
“Publiku është i etur për kulturë. Kam bindjen, se klasa politike në vendin tonë është shumë e diskredituar. Për rreth 30 vite pas përmbysjes së diktaturës që kishim shpresa të mëdha, në vend të demokracisë me D të madhe që ëndërruam ne u ndërtua një karikaturë në demokraci. Kjo është vepër e politikës. Sot kjo karikaturë ka arritur formën e saj më të shëmtuar. Njerëzit janë të mërzitur dhe se durojnë dot më këtë gjë”, ka thënë shkrimtari.
Ky është libri i dytë që Kongoli promovon për këtë vit, pasi në muajin prill ai publikoi veprën “Kapitulli i Amerikës”.
