Pas incidenteve të rënda me median sociale më popullore, themeluesi i “Facebook”, Mark Zuckerberg, njoftoi dje se do të punësojë 3,000 punonjës gjatë vitit të ardhshëm për të monitoruar përmbajtjen dhe për të hequr videot e dhunshme.
“Gjatë javëve të fundit, ne kemi parë njerëz që lëndojnë veten dhe të tjerët në “Facebook” – në video “live” ose në ato të postuara më vonë. Është zemërthyese, dhe kam qenë duke reflektuar sesi mund të përmirësojmë komunitetin tonë”, tha Zuckerberg në një postim në “Facebook”.
“Nëse do të ndërtojmë një komunitet të sigurt, duhet të reagojmë shpejt. Jemi duke punuar për t’i bërë këto video më të lehtë për t’u raportuar, në mënyrë që të mund të ndërmarrim veprimet e duhura sa më shpejt, pavarësisht se kërkon një reagim të shpejt kur dikush ka nevojë për ndihmë ose të fshijë një postim”, vazhdon më tej kreu i rrjetit më të madh social.
Të punësuarit e rinj do të bashkohen me ekipin e operacioneve të komunitetit në “Facebook”. Ata do të shqyrtojnë “miliona raporte” që “Facebook” merr çdo javë lidhur me postet që mund të shkelin kushtet përdorimit, përveç 4,500 punonjësve që tashmë shqyrtojnë postimet. “Ky veprim shpresojmë të përmirësojë procesin, për ta bërë atë shpejt”, tha Zuckerberg.
“Këta rishikues do të na ndihmojnë gjithashtu që të përmirësojmë gjërat që nuk i lejojmë në “Facebook”, si gjuha e urrejtjes dhe shfrytëzimi i fëmijëve. Dhe ne do të vazhdojmë të punojmë me grupet e komunitetit lokal dhe drejtësinë, të cilët janë në pozitën më të mirë për të ndihmuar dikë nëse ata kanë nevojë për të – ose se duan të dëmtojnë veten, ose se janë në rrezik nga dikush tjetër”, sqaron ai.
Përveç punësimit, Zuckerberg tha se “Facebook” gjithashtu “do të ndërtojë mjete më të mira për të mbajtur komunitetin të sigurt”.
Burimi: abcnews.go.com
