Aktorja e njohur e serialit “Shtëpiake të dëshpëruara”, Eva Longoria është bërë dje nënë për herë të parë. Lajmin e bukur të ardhjes në jetë të bebit të saj 43-vjeçarja e ka dhënë nëpërmjet revistës “Hola USA”.
Eva Longoria dhe bashkëshorti i saj, Jose Baston janë bërë prindër të një djali, të cilin e kanë pagëzuar me emrin Santiago Enrique.
“Ne jemi shumë mirënjohës për këtë bekim të bukur”, është shprehur çifti i njohur për revistën “Hola USA”.
Vogëlushi i tyre erdhi në jetë në Cedars-Sinai Medicinal Center, në Los Angeles dhe gëzon shëndet të plotë. Ky është fëmija i parë për aktoren e njohur, ndërsa bashkëshorti i saj ka edhe tre fëmijë të tjerë nga martesa e parë me Natalia Esperón.
Eva Longoria dhe Jose Baston janë njohur në vitin 2013 dhe janë martuar në vitin 2015. Çifti e bëri të ditur lajmin e bukur të shtatzënisë në muajin dhjetor të vitit të kaluar dhe Eva ka qenë shumë aktive në rrjetet sociale duke publikuar vazhdimisht foto me barkun e rrumbullakosur.
