Pasi shpalli në maj se do të zgjerohej në Kanada, Eurovision Song Contest tani do të nisë edhe në Amerikën Latine.
Sipas Unionit Evropian të Transmetimeve (EBU), Eurovision Song Contest 2022 gjeneroi shikime të larta në Amerikën Latine me vende të tilla si Argjentina, Brazili, Kili dhe Meksika.Tani, producentët do të fillojnë kërkimin për qytetin ku do të zhvillohet konkursi.
“Pas nisjes së Konkursit të Këngës Amerikane dhe me planet në zhvillim për “Eurovision Song Contest Canada” vitin e ardhshëm, “European Broadcasting Union” është i emocionuar që tani po punon me Voxovation për të sjellë magjinë e “Eurovision Song Contest” në Amerikën Latine”, tha në një deklaratë mbikëqyrësi ekzekutiv i Eurovision Song Contest, Martin Österdahl.
“Formati unik i Eurovizionit gjen fansa të rinj anembanë globit çdo vit dhe ne mezi presim të zgjerojmë markën në këtë pjesë të larmishme të botës.”
Lajmet për zgjerimin e markës vijnë disa javë pasi edicioni i parë i “American Song Contest” – i organizuar nga Snoop Dogg dhe Kelly Clarkson – përfundoi edicionin e tij tetë-javor më 9 maj, ku ylli i K-pop-it, AleXa u kurorëzua fituese e sezonit të parë. Ndërkohë, “Eurovision Song Contest Canada”, do të nisë në vitin 2023.
Edicioni kanadez i Eurovizionit do të pasqyrojë më nga afër versionin origjinal evropian, i cili u zhvillua në një natë të vetme deri në vitin 2004 kur u shtua një gjysmëfinale. Në vitin 2008, u shtua një gjysmëfinale e dytë, sepse aq shumë vende donin të merrnin pjesë, saqë nuk kishte kohë të mjaftueshme në një mbrëmje për t’i përfshirë të gjitha.
