Rastet e artistëve shqiptarë, që korrin sukses jashtë trevave shqiptare janë të shumta dhe mjaft shpresëdhënëse për shumë të tjerë. E ngjashme është historia e aktorit, Erand Hoxha, i cili e ka nisur karrierën në aktrim katër vite më parë, krejt rastësisht, kur një miku i tij italian i kërkoi ndihmë për t’i gjetur disa makina për filmin e ri.
Sot Erandi ka arritur të depërtojë në kinematografinë botërore falë vullnetit dhe punës së tij ndërsa ka fituar edhe eksperiencë në fushën e regjisurës. Aktori foli pak muaj më parë për portalin “Iconstyle.al” mbi projektin e radhës “Elvis Walks Home”, pa ditur suksesin e madh që do të korrte ky film.
Sot “Elvisi kthehet në shtëpi” është një nga konkurrentët për çmimin “Grand Prix des Americas” për 2017. Bashkëprodhimi britanik-shqiptar i përzgjedhur mes dhjetëra propozimeve thuajse nga çdo shtet, do të marrë pjesë në garën botërore të Festivalit Botëror të Filmit në Montreal të Kanadasë që zhvillohet në javën e fundit të gushtit.
Me një kast aktorësh, si Dritan Kastrati, Amos Muji Zaharia, Erand Hoxha dhe Ekan Gjinaj, “Elvisi kthehet në shtëpi” është një film tri-gjuhësh, kryesisht anglisht dhe me pak shqip e serbisht. Mickey që luhet nga Dritan Kastrati është një shqiptar i paligjshëm në Londër. Si admirues i Elvis Priestly, puna e tij është të argëtojë trupat britanike paqeruajtëse të vendosura në Ballkan pas luftërave të viteve ‘90.
Për t’i shpëtuar vdekjes nga dora e disa fëmijëve, Mickey, prezantohet si mjek dhe i çon ata në kampin e refugjatëve të Organizatës së Kombeve të Bashkuara. Për të ndalur luftën e nisur aty, ai nis të këndojë por kupton se nuk është as Mickey as Elvis por një njeri pa atdhe.
Pas konkurrimit në Montreal, ky film që tregon historinë e çdo fëmijë në botë që njohu luftën, do të ketë premierën e tij edhe në Tiranë në nëntor.
