Zyrtarët e Shëndetësisë në Çikago kanë raportuar rastin e parë në SHBA të transmetimit të Koronavirusit vdekjeprurës nga njeriu te njeriu.
Pacienti është bashkëshorti i një gruaje që mbarti infeksionin nga Wuhan-i, Kinë, tha të enjten Qendra e SHBA-ve për Kontrollin e Sëmundjeve.
Zbulimi shënon raportin e dytë të virusit në Illinois dhe rastin e gjashtë të konfirmuar në SHBA.
Më shumë se 170 njerëz kanë vdekur në Kinë – epiqendra e shpërthimit të virusit – dhe mbi 6.000 janë infektuar.
Virusi është përhapur në çdo rajon të Kinës dhe në të paktën 16 shtete në botë, përfshirë Tajlandën, Francën, SHBA dhe Australinë, me numrin global të vdekjeve në 170.
Por akoma më e frikshme dhe e rrezikshme po bëhet situata për ne shqiptarët, pasi “repubblica.it” shkruan sot se janë konfirmuar dy rastet e para në Itali.
Tashmë Italia ka bllokuar edhe linjën direkte ajrore me Kinën. Masat shtesë parandaluese mund të merren për njerëzit me të cilët çifti kishte kontakt.
Organizata Botërore e Shëndetësisë shpalli sot emergjencë globale për përhapjen e shpejtë të koronavirusit.
Shefi i organizatës Tedros Adhanom Ghebreyesus deklaroi se arsyeja kryesore nuk është ajo që po ndodh në Kinë, por ajo që po ndodh në vendet e tjera të botës.
Shqetësimi kryesor është përhapja në shtetet që kanë një sistem më të dobët shëndetësor, dhe vendi ynë renditet ndër këto shtete, fatkeqësisht.
