Masat e jashtëzakonshme për emergjencën e koronavirusit prej disa ditësh kanë nisur të merren dhe në Britaninë e Madhe. Vendi ka filluar të mobilizohet për një përhapje masive të epidemisë ndërkohë që sytë e të gjithëve janë tek sistemi shëndetësor.
Mësohet se ditën e sotme, kryeministri Boris Johnson do të organizojë një mbeldhje virtuale me përfaqësuesit e disa prej kompanive më të mëdha prodhuese si Honda, Dyson, JCB, etj. për t’u kërkuar atyre që të nsiin prodhimin e ventilatorëve.
Një nga kompanitë që ka dhënë dritën jeshile për prodhimin e tyre deri më tani është Rolls Royce.
Sipas Sekretarit për Shëndetësinë Matt Hancock, në sistemi shëndetësor britanik ka 5000 ventilatorë në total, shifër kjo e pamjaftueshme për situatën me të cilën vendi pritet të përballet.
Sipas Hancock, vendi do të ketë nevojë për shumë herë më shumë ventilatorë sesa shifra që ata disponojnë, ndaj ka nisur marrja e menjëhershme e masave.
Megjithatë, ekpertët e mjekësisë paralajmërojnë se shtimi i numrit të ventilatorëve është i padobishëm nëse nuk ka mjaftueshëm mjekë dhe infermierë të aftë për përdorimin e tyre.
Mësohet se qeveria britanike gjithashtu ka nisur punën edhe në këtë drejtim. Sekretari për Shëndetësinë ka bërë të ditur se mjekë të cilët punojnë në sektorë të tjerë janë thirrur për shërbyer në spitalet ku trajtohen të sëmurët me COVID-19, një pjesë e së cilëve do të shërbejë pikërisht në përdorimin e ventilatorëve.
Sakaq, një nevojë emergjente për ventilatorë duket se është prezente dhe në Shqipëri, ku ende nuk ka një deklaratë zyrtare nga ana e Ministrisë të Shëndetësisë për numrin e këtyre pajisjeve.
Pak kohë më parë, përpara rasteve të para me COVID-19 në Shqipëri, shefi i Kardiokirurgjisë në QSUT Edvin Prifti bëri me dije se në vendin tonë, gjenden vetëm 140 ventilatorë, përfshirë këtu edhe ata të strukturave private.
Një shifër e tillë në prag të një epidemie që sikurse u shpreh dhe kryeministri Rama, do të vijë duke u rritur gjithnjë e më shumë në dy javët në vazhdim, duket totalisht e pamjaftueshme.
Ventilatorët janë thelbësorë për trajtimin e personave me komplikacione të rënda, ndaj shpresojmë që Ministria e Shëndetësisë të marrë masat e duhura derisa jemi ende në kohë.
