Vlora është tronditur sot nga një ngjarje tepër e rëndë. Fatmir Hodo, 64 vjeç ka mbetur i pajetë pasi u qëllua me armë zjarri. Ngjarja ka ndodhur mesditën e sotme rreth orës 14:55 në fshatin Kotë të Selenicës dhe Hodo ishte kreu i njësisë administrative në këtë fshat.
Viktima është qëlluar me çifte teksa ndodhej brenda ambienteve të një lokali në qendër të fshatit.
Sipas “Balkan Web” policia ka shkuar menjëherë në vendngjarje për zbardhjen e ngjarjes dhe nga raportimet thuhet se viktima ka pasur konflikt të mëparshëm me autorin e krimit.
Autori është personi me inicialet A.D, 43 vjeç dhe pak minuta pas ngjarjes është kapur nga policia.
Njoftimi i policisë
Më datë 09.11.2018, rreth orës 14:55, në një lokal në fshatin Kotë, është qëlluar me armë gjahu shtetasi F.H, (Kryetar i Njësisë Administrative Kotë), i cili për pasojë ka ndërruar jetë.
Policia ka mbritur menjëherë në vendngjarje dhe ka identifikuar autorin e ngjarjes i cili dyshohet të jetë shtetasi A.D, rreth 43 vjeç nga fshati Gumenicë.
Forcat e policisë kanë kapur autorin.
