Mungesa e kushteve të duhura higjieno-sanitare në qendrat estetike në Tiranë ka ngritur në këmbë institucionet e shëndetësisë, pasi mësohet se sallonet e thonjve në kryeqytet janë shndërruar në vatra të përhapjes së infeksione të ndryshme të rënda. Burime ekskluzive për “iconstyle.al” kanë bërë të ditur se në Shërbimin e Sëmundjeve Infektive në Qendrën Spitalore Universitare Nënë Tereza së fundmi janë regjistruar me dhjetra raste të vajzave të reja të diagnostikuara me infeksione dhe si burim i përhapjes kaq të gjerë dyshohet të jenë pikërisht sallonet e thonjve.
Dyshohet madje se mund të ketë dhe raste të infektimit me virusin vdekjeprurës HIV-AIDS, megjithatë një gjë e tillë nuk konfirmohet nga institucionet përgjegjëse.
Sipas burimeve të “iconstyle.al”, fluksi i madh i klienteve në qendrat estetike bën që tek persona të ndryshëm të përdoren të njëjtat pajisje, pa kaluar paraprakisht në fazën e sterilizimit, që është e domosdoshme në sallonet e thonjve ku rreziku i përhapjes së infeksioneve është shumë i madh. Kujtoni të gjitha rastet kur estetistja ju ka gjakosur kutikulat në përpjekje për t’i prerë sa më pranë sipërfaqes së thonjve… E njëjta gjë mund të ndodhë me një kliente të sëmurë!
Sipas studimeve të ndryshme, mikroorganizmat që shkaktojnë këto sëmundje, ashtu si dhe virusi HIV-AIDS, mund të mbijetojnë për një kohë relativisht të gjatë mbi një sipërfaqe jashtë trupit njerëzor, siç janë pajisjet që përdoren për trajtimin e thonjve. Pajisja e vetme që siguron eleminimin total të organizmave infektive është autoklava, që mungon rëndom në pjesën më të madhe të salloneve të bukurisë në kryeqytet ku ndonjëherë si mjet disinfektimi përdoret edhe açetoni, që nuk është aspak efektiv në këtë aspekt.
“Iconstyle.al” ka mësuar se ky shqetësim ka alarmuar institucionet përgjegjëse për sektorin e shëndetësisë, ku po punohet për marrjen e masave.
Sipas ekspertëve të mjekësisë, përhapja e HIV-it nga pajisjet që përdoren në qendrat estetike është një fenomen i rrallë, megjithatë ka pasur raste të regjistruara. Më i bujshmi është ai i një vajze 22-vjeçare braziliane në vitin 2014, e cila u diagnostikua me HIV pasi përdori të njëjtat pajisje për thonjtë me kushërirën e saj (lexo këtu).
Në Shqipëri, paralajmërimet për përhapjen e sëmundjeve të tilla të rënda kanë nisur që në vitin 2017, ku ekspertët bënin thirrje për rrezikun që u kanosej në qendrat estetike, por pa folur për raste konkrete të regjistruara të infektimit me HIV (lexo këtu).
