Një javë më parë, në rrugën “Dritan Hoxha” në Tiranë u sulmua dhe kërcënua drejtori i aeroportit “Nënë Tereza”, Costandin Von Alvensleben.
Në një kallëzim të bërë në polici, Alvensleben ka deklaruar se teksa ishte duke kaluar me makinë në rrugën në fjalë, një i ri i maskuar me një kapuç i është afruar dhe e ka qëlluar me gurë.
Fatmirësisht, dëmet kanë qenë vetëm materiale.
Por teksa policia vijon hetimet për të zbardhur ngjarjen, “gazetareforma.com” ka siguruar pamjet e kamerave të sigurisë në rrugën “Dritan Hoxha”, që zbulojnë portretin e të riut.
Në video, ai shfaqet duke vrapuar në një rrugë dytësore ku i shihet qartazi portreti, ndërkohë që në një tjetër pamje ai mban të vendosur në kokë kapuçin që shihet dhe në fotot e publikuara një javë më parë.
Por ndonënse ka kaluar një javë nga ngjarja, policia ende nuk ka bërë të mundur identifikimin e agresorit të përfshirë në këtë ngjarje të një rëndësie të lartë, për shkak të figurës që Alvensleben përfaqëson.
Në kallëzimin e tij, drejtori i aeroportit “Nënë Tereza” ka bërë të ditur se nuk ka konflikte personale apo për shkak të detyrës.
Megjithatë, pozicioni i tij tejet i rëndësishëm në Tirana International Airport, mund të jetë bërë shkak për një tentativë intimidimi sikurse ishte sulmi në rrugën “Dritan Hoxha”. /gazetareforma
