Këngëtarja Greta Koçi ishte e ftuar këtë fundjavë në emisionin “n’Kosovë show” dhe gjatë intervistës u përballë me një surprizë. Krejt papritur moderatori i emisionit futi në studio një djalë që kërkonte të komunikonte me Gretën.
Ai quhej Fitim dhe pretendonte se e njihte Gretën, ndërsa këngëtarja u shpreh se ishte hera e parë që e shihte.
“Në fillimet e karrierës Gretën e kam pasur fiksim, ndërkohë filloi pëlqimi i dashurisë. Fillova ta ndjek nëpër koncerte, kur ka ardhur në Hanover jemi takuar në prapaskenë, kemi folur”, tha Fitimi.
Ndërkohë që Greta shprehej me bindje se nuk e kishte parë ndonjëherë, djali insistonte se ata të dy njiheshin shumë mirë.
“Kemi diskutuar edhe nëpërmjet internetit. Gjatë komunikimit me internet, tu e shty, tu e shty këtë punë..”, vazhdoi djali.
Pas kësaj Greta u nxeh dhe e ndërpreu Fitimin teksa fliste.
“Çfarë ke shty me mua ti? Se të dalësh ti tani publikisht e të thuash ke folur me mua, s’ka shans të flas njeri me mua”, tha Greta.
Nga ana tjetër djali pretendonte se kishte folur edhe me prindërit e Gretës për dashurinë që ndjente ndaj saj.
“Kam folur edhe me babën e mamanë tënde. I kam treguar që e dua, ndjenjat e mia”, tha Fitimi.
“Unë se njoh fare këtë, paska fol ky me mua. Jeni në terezi apo jo? S’je kalama, je goxha djalë që të mashtrosh kështu. Ti mund të kesh ardhur në prapaskenë, ke bërë një foto, më ke dhënë dorën, kjo nuk do të thotë që unë të kam dhënë më shumë konfidenca seç duhet”, u shpreh Greta.
Në këtë moment Fitimi nxori unazën nga kutia dhe iu ul në gjunjë këngëtares.
“Seriozisht e ke”, e pyeti Greta e habitur.
“Kam marrë dhe lejen e babait të Gretës”, tha Fitimi.
“Paske leje nga babai im dhe jo nga e zonja punës. Ti s’do martohesh me babën tim”, i tha këngëtarja ndërsa Fitimi nisi të qante duke u shprehur se ndihej i ofenduar.
“Ti nuk më ke takuar ndonjëherë, e fantazon në tru. Unë nuk të njoh fare. Po martohu me ndonjë tjetër, me mua e gjete të fiksohesh. Nëse je fans të vlerësoj shumë, por jo me kaluar në gjëra të tilla se edhe ti vetë lëndohesh. Nuk ke fol me mua more ti djalë. Nuk ke fol me mua. Po të flas si njeri se jemi edhe para kamerave”, u shopreh Greta.
Në këtë moment moderatori i tha këngëtares se kamerat ishin fikur dhe emisioni nuk po regjistrohej më. Pas kësaj Greta u çua dhe reagoi në mënyrën më të ashpër të mundshme.
“Ça do ti vëlla? O ti zotëri kush je ti njëherë? Je mirë nga trutë ti? Është ndonjë lojë kjo? Se këto janë të turpshme. Të thuash këtu kam folur me të, ku ka shanse njeri të flasë me mua. Pse ça u bo këtu, u lirua?”, tha Greta e nxehur.
Kur situata ishte nxehur dhe Greta shpërtheu edhe në ofendime ndaj djalit, moderatori i emisionit zbuloi se bëhej fjalë për një lojë dhe se Fitimi ishte aktor.
