Mbrëmjen e sotme është shënuar një tjetër viktimë për shkak të virusit vdekjeprurës Covid-19.
Pacienti 71-vjeçar nga Shkodra ka ndërruar jetë në spitalin “Shefqet Ndroqi”, pas një muaji në gjendje të rëndë shëndetësore.
Ai vuante nga diabeti, insuficienca kardiake, hipertensioni dhe anemia kronike, ndërsa lajmin e ka konfirmuar Ministria e Shëndetësisë.
Njoftimi i plotë:
“Një pacient 71-vjeçar, i konfirmuar me COVID19, në gjendje të rëndë prej 1 muaji, me insuficiencë respiratore akute, ka ndërruar jetë në spitalin “Shefqet Ndroqi” mbrëmjen e sotme. Pacienti 71-vjeçar me inicialet B.S., nga Shkodra, me pneumoni bilaterale, që vuante dhe nga sëmundje bashkëshoqëruese diabet, insuficiencë kardiake, hipertension, anemi kronike, megjithë asistencën e specializuar mjekësore në reanimacionin e spitalit “Shefqet Ndroqi”, nuk arriti të mbijetojë. Ministria e Shëndetësisë dhe Mbrojtjes Sociale u shpreh ngushëllimet familjeve të të ndjerit dhe apelon qytetarët t’i respektojnë me shumë rigorozitet masat e distancimit fizik, pasi janë përcaktuese për frenimin e përhapjes së COVID-19. 31 qytetarë nuk e kanë fituar dot betejën me COVID19, pavarësisht përpjekjeve të stafeve mjekësore të spitaleve COVID.”
Kështu, numri i jetëve të humbura në Shqipëri ka shkuar në 31, ndërsa numri zyrtar i të infektuarve ka arritur 766.
