Loja “Balena Blu” tashmë po qarkullon edhe në Shqipëri, pasi një numër shqetësues fëmijësh dhe të rriturish janë raportuar që e luajnë.
Pas rastit të rëndë shënuar ditën e djeshme në vend, ku një 12-vjeçar tentoi të hidhej nga pallati duke iu bindur “Balenës Blu”, një tjetër rast flagrant po qarkullon në media.
Këngëtarja e njohur shqiptare Xhesika Polo, ka marrë një mesazh në adresën personale në rrjetin social “Instagram”.
Personi në fjalë ka një adresë me foton e nje balene dhe emrin e saj. Ai i shkruan Xhesikës për ta pyetur në lidhje me pjesëmarrjen në këtë sfidë, por ajo reagoi kështu:
“Sot më erdhi një mesazh nga një faqe e vetëquajtur “Balena Blu”. Kujtdo që i duket argëtuese të përhapë një lojë vdekjeprurëse te brezi i ri, te fëmijët e pafajshëm, i duhet të kalbet në burg sepse është KRIM! Miq, të afërm e kolegë, bëjini “report” kësaj faqeje, çdo faqeje të tillë të ngjashme dhe MOS HESHTNI! Gjendja është alarmante”, shkruan këngëtarja.
