Një çështje që ka bërë bujë në mediat ndërkombëtare po merr zhvillime të reja, ndërsa ish-bankieri i JPMorgan Chase, Chirayu Rana, është larguar nga kompania e tij e fundit vetëm pak javë para se të bënte publike akuza të rënda ndaj një ekzekutiveje të bankës, shqiptares Lorna Hajdini. Sipas burimeve të larta pranë firmës së investimeve Bregal Sagemount, 35-vjeçari nuk është më pjesë e kompanisë që prej 2 prillit 2026. Largimi i tij ka ndodhur rreth tre javë përpara se ai të ngrinte një padi të bujshme ndaj Lorna Hajdini, duke e akuzuar për abuzime serioze.
Në padinë e depozituar fillimisht në një gjykatë në Nju Jork, Rana pretendonte se Hajdini e kishte droguar dhe e kishte detyruar në marrëdhënie seksuale, duke përdorur edhe presion profesional. Ai gjithashtu pretendonte për përndjekje dhe dëmtime të rënda emocionale e profesionale.
Megjithatë, këto akuza janë hedhur poshtë kategorikisht nga pala tjetër. Përfaqësuesit ligjorë të Hajdinit i kanë cilësuar ato si “plotësisht të sajuara”, duke theksuar se ajo nuk ka pasur asnjëherë një marrëdhënie të tillë me paditësin dhe madje nuk ka qenë kurrë në vendin ku pretendohet se ka ndodhur incidenti.
Një hetim i brendshëm i zhvilluar nga JPMorgan Chase, i cili përfshinte shqyrtimin e emaileve, regjistrave telefonikë dhe dëshmive të personave të tjerë, nuk gjeti asnjë provë që mbështeste pretendimet e ngritura nga Rana.
Zyrtarët e bankës deklaruan publikisht se “nuk ka asnjë bazë për këto pretendime”, duke shtuar se vetë paditësi nuk ka bashkëpunuar plotësisht me hetimin dhe nuk ka ofruar prova të rëndësishme.
Sipas disa burimeve, Rana kishte tentuar më herët të arrinte një marrëveshje financiare me bankën, që thuhet se arrinte në miliona dollarë, por pa sukses. Kjo ka shtuar dyshimet mbi motivet e vërteta të padisë. Ndërkohë, është zbuluar gjithashtu se Hajdini nuk kishte ndikim mbi bonusin apo kompensimin e tij, pasi ata raportonin te drejtues të ndryshëm brenda strukturës së bankës.
Pas publikimit të identitetit të tij si “John Doe”, Rana duket se ka filluar të tërhiqet nga hapësira publike. Ai ka çaktivizuar profilet e tij në rrjetet sociale si LinkedIn dhe Instagram, ndërsa emaili i tij profesional rezulton ende aktiv.
Firma Bregal Sagemount konfirmoi vetëm se ai nuk është më punonjës i tyre, pa dhënë detaje mbi arsyet e largimit.
Rana kishte ndërtuar një karrierë në disa prej institucioneve më prestigjioze financiare në Wall Street, përfshirë Morgan Stanley, Credit Suisse dhe The Carlyle Group, përpara se t’i bashkohej JPMorgan Chase në vitin 2024. Nga ana tjetër, miq dhe bashkëpunëtorë të Hajdinit e përshkruajnë atë si një profesioniste në ngritje, ndërsa e gjithë kjo situatë thuhet se ka pasur një ndikim të rëndë në jetën e saj personale dhe profesionale.
