Një vajza 29-vjeçare nga Jugu i Shqipërisë ka tronditur shikuesit e emisionit ‘Me zemër të hapur’ gjatë se premtes, pasi rrëfeu se ka pasur një lidhje jashtëmartesore me një këngëtar të njohur të muzikës popullore, gjithashtu nga Jugu, i cili është i martuar dhe ka 3 fëmijë.
Ajo tregoi se nga marrëdhënia e tyre, ka lindur një vajzë e cila tashmë është 3 vjeçe, së cilës 50-vjeçari i ka mohuar atësinë, duke lënë nënë e bijë pa asnjë të ardhur ekonomike.
E reja tregoi se njohja e tyre kishte ndodhur disa vite më parë, kur ajo u vendos me qira në shtëpinë e tij pas ndarjes nga bashkëshorti.
‘Filloi me shkëmbimin e mesazheve, ishte ai këmbëngulësi. E dija që kishte familje, por ishte ai këmbëngulësi, është e vështirë ta shpjegoj… Kisha miqësi me gruan e tij, nuk kisha shpresa as tek ai se më donte dhe e doja. Është diçka që s’ia vlen më ta diskutoj, se është pak e rëndë. Unë duhet të bëja veprimet e duhura që në fillim. Jam penduar vetëm se nuk tregova çfarë ndodhi. Këtu kam ardhur vetëm për vajzën.’- rrëfeu në studio 29-vjeçarja duke shpjeguar se e bija në fakt kishte ardhur në jetë pas një marrëdhënieje seksuale pa dëshirën e saj.
Ajo tregoi në studion e emisionit se këngëtari, burrë në moshë, fillimisht e ndihmoi me vajzën dhe madje e ftonte edhe në shtëpinë e tij ku e kishte prezantuar si mikeshë dhe fëmijët e tij luanin me vajzën, pa e ditur se në të vërtetë e kishin motër. Por gjërat më pas ndryshuan dhe gruaja e këngëtarit mësoi të vërtetën.
“Ajo më ftoi për kafe, kur e mori vesh, më kërkoi që vajzën ta çoja në jetimore duke më thënë se nuk më shikonte dot duke vuajtur… Asaj i kërkoj të falur vetëm se nuk i thashë çfarë ndodhi atë natë kur ne të dy ishim të pirë. Ai më bënte presion pastaj dhe nuk ia tregova kurrë”, tregoi 29-vjeçarja e cila tashmë ka mbetur në rrugë, me vajzën e vogël që e ushqen me ato që i falin, pasi edhe motra dhe vëllai e kanë braktisur qëkurse mësuan për historinë e saj me një burrë të martuar.
