Ndërkohë që ministri i Turizmit, Blendi Klosi i ka pritur me shampanjë turistët e parë nga Bjellorusia që kanë mbërritur në vendin tonë për të shijuar pushimet, mbeturinat në qytetin e Durrësit vijojnë të mbeten panorama më e trishtë jo vetëm për këta turistë, por edhe për banorët.
Të hënën qyteti është pastruar, por këto mbeturina nuk janë depozituar asgjëkundi duke u bërë kështu një problematikë e madhe në një kohë që pritet të ringrihet sektori i turizmit në vend nga kriza ekonomike e pandemisë.
“Shqiptarja.com” shkruan se aktualisht mbeturinat janë lënë nëpër kamionë, pasi nuk ka ende një vend se ku mund të shkarkohen.
Fillimisht u mendua që mbeturinat të depozitohen në Gjirin e Lalzit, por një gjë e tillë është kundërshtuar me forcë nga banorët e kësaj zone, dhe me të drejtë duke qenë një zonë e madhe turistike.
U tentua gjithashtu për një marrëveshje me banorët e fshatit Vadardhë të Sukthit, por sërish nuk u arrit një dakordësi. Të shqetësuar, ata bllokuan rrugën me goma dhe sende të tjera që kamionët e mbeturinave të mos kalojnë.
Dërgimi i mbeturinave në Manzë javën e kaluar, u pa se ishte një katastrofë mjedisore kur ato filluan të digjeshin shumë pranë banesave të banorëve të fshatit.
Pas mbylljes së landfillit në Porto Romano, duket se situata paraqitet më alarmante se kurrë në mes të sezonit turistik. Edhe pse Sharra ka kapacitetin e duhur që mund të përballojë për momentin këtë situatë emergjente, është ende në disutim nëse mbeturinat do të dërgohen në Landfillin e Sharrës.
Depozitimi i mbetjeve në Sharrë kapte vlerën 29 euro/ton, dhe bashkia u përball me mungesën e fondeve për të dërguar dhe trajtuar mbetjet e saj në Sharrë, duke e çuar qytetin në kolaps.
Për këtë ka reaguar edhe kryeminsitri Edi Rama, i cili përmes një postimi në Twitter, thotë se nuk do të ketë hedhje plehrash në asnjë zonë të bashkisë Durrës në këtë fazë tranzicioni.
“Në vend që ta dizinformojnë publikun dhe të keqpërdorin shqetësimin qytetar, për audiencë dhe për të nxitur shfaqjet e pakënaqësisë që ushqehet me lajme të rreme, mediat duhet t’u thonë durrsakëve se s’do të ketë hedhje plehrash në asnjë zonë të bashkisë në këtë fazë tranzicioni!”, shkruan Rama.
Durrësi ka shpallur gjendjen e emergjencës mjedisore, pasi çdo kazan plehrash në qytet është pushtuar nga mbeturinat. Me rritjen e temperaturave kjo po kthehet në një problematikë edhe për përhapjen e infeksioneve.
Panorama e qytetit në këtë sezon veror është e trishtë dhe për të ardhur keq, dhe ministria ende nuk po gjen një zgjidhje!
