Kryeministri Edi Rama dhe Ministrja e Shëndetësisë. Ogerta Manastirliu, kanë dal sot në një konferencë për shtyp për të treguar me detaje planin e vaksinimit kundër Covid-19. Rama u shpreh se ai do të jetë i pari, që do e bëjë vaksinën, duke mos respektuar as radhën vetëm e vetëm që t’ju dëshmojë njerëzve se është e sigurt.
“Unë do ta bëj vetëm për të dhënë mesazhin që vaksina jo vetëm është e sigurt por edhe për t’ju thënë të gjithëve se dokrrat me çipa apo transformim të ilirëve në aziatik janë qesharake. Siç e kanë bërë edhe kolegë të mitë do ta bëj edhe unë. Meqë kemi një grup konspiracioni të afektuar nga llumi i rrjeteve sociale do ta bëj siç e kanë bërë kolegët e mi, nuk do të dëshiroja që t’i zija radhën askujt, por do ta bëj sot vetëm për këtë arsye”, tha Rama.
Kryeministri u shpreh se vaksina nuk është e detyrueshme për askënd, por është e këshillueshme, sepse është arma e vetme që kemi kundër Covid-19.
Ndërsa Manastirliu shpjegoi me detaje se si do të funksionojë procesi i vaksinimit në vendin tonë. Ajo tha se si fillim do të vaksinohet stafi mjekësor, duke filluar nga ata që janë në vijën e parë të frontit të luftës me Covid-19, më pas infermierët e me radhë.
“Të gjithë punonjësit e shëndetësisë që ofrojnë shërbim në spitalet COVID do të jenë të parët që do të vaksinohen. Më tej vijojmë me ato në reanimacion, urgjenca dhe në të gjithë sistemin shëndetësor. Prioritete për t’u vaksinuar janë personat e moshuar dhe ato me probleme shëndetësore. Personat e të moshuar që jetojnë në shtëpi të moshuarve dhe shtëpitë e kujdesit shëndetësor, do të vijojmë me personat rreth 75 vjeç që janë rreth 170 mijë. Në Arenën Kombëtare, sipas kohës që i nevojitet një personi për vaksinim, se në momentin që ai vjen për t’u vaksinuar ka një formular dhe kërkon një kohë të posaçme dhe pas kryerjes së vaksinën qëndron në monitorim 30 minuta. Shpërndarja e vaksinës nuk do të jetë vetëm në Tiranë, fillon me Shkodrën dhe Vlorën. Janë marrë masa për vendosjen e postacioneve do të jenë në monitorim jo vetëm me mjekë, por ekipi i Urgjencës kombëtare do të luajë një rol të rëndësishëm. Do të shënohet data e vaksinës së parë, pastaj e vaksinës së dytë”, shpjegoi ministrja e Shëndetësië.
