Për tre vite e gjysmë ai drejtoi Ministrinë e Brendshme, por shumë pak gjëra dimë për jetën e tij brenda dhe jashtë dyerve të punës. Atëherë e nisim me pozicionin e ish-ministrit Saimir Tahiri dhe një nga pyetjet që mund t’i keni bërë vetes: ç’bëhet me drogën që kapet nga policia.
I pyetur nga Ermal Mamaqi gjatë emisionit të tij, Tahiri tregoi një episod që i ka ndodhur kur ka marrë detyrën në vitin 2013: “Një pjesë e drogës së kapur ruhej tek bodrumet e ministrisë. Dhe mbi zyrat e gjendjes civile ishin depozitat e drogës. Unë e mora kurajën shkova nga kurioziteti dhe kishte një erë që po të rrije brenda një minutë, dilje me pogonishte.”
Megjithatë ish-ministri tregon se me një kërkesë drejtuar prokurorisë droga u spostua diku tjetër jashtë Tirane, ku më pas i nënshtrohet një procedure djegieje.
Ndonëse nuk e kemi vënë re, Tahiri shprehet se detyra si ministër ka bërë që ta lërë pak veten pas dore, për këtë arsye, tha Tahiri, është koha e duhur për t’iu dedikuar vetes dhe familjes së tij.
Ai është sot babai një djali 6-vjeçar, me të cilin përpiqet që të krijojë një marrëdhënie sa më shoqërore me të.
“Me djalin mundohem të krijojë një marrëdhënie që të më perceptojë pak si shokë, kur e ekzagjerojë pak them: prit se je babi“, shprehet Tahiri.
Duket se detyra si ministër i Brendshëm ka ndikuar shumë në mënyrën se si e shohin miqtë e tij. I ftuar në emisionin “Xing“ me Ermal Mamaqin, Tahiri u shpreh se miqtë e shohin si një njeri të rreptë, e ndërsa na ka rrëfyer se nuk është aspak një natyrë romantike.
Ermali: Je tip që thua shpesh “shpirti”, “të dua“?
Tahiri: Jo unë nuk jam natyrë romantike.
Ndoshta shumë pak e kemi ditur se Tahiri ishte ai djali në shoqëri që tregonte shumë barcaleta, dhe si për ironi të fatit më së shumti protagonist kryesor kishin policët, gjë e cila ndryshoi me bërjen e tij ministër.
“Unë tregoja shumë barcaleta, pasi fillova punë nuk thashë më. E shihja sakrificën dhe nuk ia vlen të tallesh me to”, tregon Tahiri.
I njohur për natyrën e tij aventurieste, hedhjet nga helikopteri, fluturimet me parashutë, Tahiri ka rrëfyer edhe dëshirën e madhe për të bërë një garë me makinën e “Formula One”, dëshirë që besojmë se do të realizohet shumë shpejt, për shkak të natyrës së tij shumë e vendosur për të arritur atë që do.
